- Peşəkar səviyyədə keçirdiyiniz ilk mövsümdə kapitan sarğısını daşıyırsınız. İyulun 5-də 19 yaşı tamam olacaq bir futbolçu üçün bu, ağır yük deyil?

- Kapitanlıq böyük məsuliyyətdir. Bu funksiyanı qış fasiləsindən sonra yerinə yetirirəm. Fikrimcə, hər bir futbolçu yaşından asılı olmayaraq, bunun ağırlığını hiss edir. Ancaq "sarğı"nı daşımaq həm də qürurvericidir. İstər müdafiəçi, istərəs də kapitan kimi işimin öhədsindən gəlmək üçün bütün gücümü ortaya qoyuram. Futbol komanda oyundur, burada fərdlər böyük ölçüdə hər şeyi həll edə bilməz.

- Bunadək AFFA-nın təşkil etdiyi aşağı yaş qrupları üzrə liqalarda oynamısınız. Həmin turnirlərlə I Divizion arasında fərq böyükdür?

- Futbola Masazırda, "Əlincə” klubunda başlamışam. İlk məşqçim Zaza Çankvetadze olub. Sonra hazırkı baş məşqçimiz Vasif Haqverdiyev gəldi və onunla birgə komanda şəklində "Vətən” klubuna getdik. Orada 2016/2017 mövsümündə U-17 liqasının çempionu olduq. Ardınca komanda formasında "Səbail”ə keçdik və U-19 liqasında 2-ci yeri tutduq. Ötən yay isə yenə komanda şəklində "Sabah”a gəldik. Əlbəttə, müqayisə aparsaq, müəyyən fərqlər var. Yaş artdıqca, oyunçuların səviyyəsi də yüksəlir. Burada həm Premyer Liqa klublarının əvəzedici komandaları, həm də "Tovuz Turan”, "Ağsu”, "Şüvəlan”, MOİK kimi kollektivlər var. Xüsusən də adlarını çəkdiyim klubların heyətində elita təcrübəsi olan çox sayda futbolçu var. Bu cür rəqiblərə qarşı oynayanda bərkiməyə başlayırsan.

- Klubla yanaşı, milli karyeranız da var. Baş məşqçi Vüqar Məmməd tərəfindən U-19 yığmasına dəvət almısınız...

- Bəli, daha əvvəl U-16 millisinin seleksiya xarakterli məşqlərində olmuşam. Lakin ilk dəfə U-19 komandasına dəvət alıb, təlim-məşq toplanışlarında iştirak etmişəm. Sonuncu dəfə ötən ilin dekabrında Bakı toplanışına qatılmışam. Rusiya və Kosovo ilə yoldaşlıq oyunlarında da iştirak etmişəm.

- Bəs, bu il niyə çağırılmamısınız?

- Bu, baş məşqçinin seçimidir. Belə uyğun görüblərsə, demək, üzərimdə daha da çox çalışmalıyam. Ölkəsinin əsas komandasında oynamaq hər bir oyunçunun arzusudur. Məqsədim Azərbaycan millisinin aparıcı futbolçusu olmaqdır. Buna nail olacağıma inanıram.

- Millidə örnək götürdüyünüz futbolçu kimdir?

- Sağ cinah müdafiəçisiyəm. Yığmada bu mövqedə uzun illərdir Maksim Medvedev çıxış edir. Onun kimi təcrübəli futbolçularımızdan öyrənəcəyimiz çox şey var. Kumirim isə braziliyalı Dani Alveşdir. Özüm "Barselona" azarkeşiyəm, onu isə Kataloniya komandasında çıxış etdiyi vaxtdan izləyirəm.

- Hələlik "Sabah”ın əsas komandasının heyətində Premyer Liqada debüt etməmisiniz. Lakin Azərbaycan Kubokunun 1/8 finalında "Ağsu”nu 3:0 hesabı ilə məğlub etdiyiniz görüşdə əvəzetmədən meydana daxil olmusunuz...

- Bəli, "Ağsu” ilə matçda ilk dəfə əsas komandanın heyətində meydana çıxmışam. Premyer Liqada isə şansımı gözləməliyəm. Hələ gəncəm, usta futbolçularla rəqabət aparmaq üçün təcrübə toplamalıyam. Bu günlərə gəldiyim üçün baş məşqçimiz Vasif Haqverdiyevə təşəkkür edirəm. Sevindirici haldır ki, əsas komandaya Elşad Əhmədov kimi gənclərə böyük önəm verən bir mütəxəssis rəhbərlik edir. Bəzən mən də əsas komandanın məşqlərində iştirak edirəm. Bunun özü də bizim üçün böyük təcrübə, məktəbdir. Yəni, "Sabah”da bütün gənc futbolçular diqqətdə saxlanılır. İlk hədəfim burada əsas komandaya düşməkdir. Sonrasını zaman göstərəcək.

- "Sabah-2” 19 xalla 9-cu pillədə qərarlaşsa da, ən az qol buraxan iki komandadan biridir. Sizdən başqa yalnız lider MOİK qapısında 11 top görüb. Bu, arxa xəttin güclü olmasından, yoxsa müdafiə futbolu oynamağınızdan irəli gəlir?

- Az qol buraxmağı yalnız müdafiəçilərin ayağına yazmazdım. Bu işdə bütün komandanın rolu var. Oyundan-oyuna inkişaf edirik. Bəzi matçlarda şanssızılıq oldu, qol fürsətlərimizi boşa verdik. Daha yuxarı pillələrə yüksələcəyimizi düşünürəm.