"Hazırkı seçki sloqanlarını “meyxana” adlandıra bilərik" (MÜSAHİBƏ)

- Millət vəkilliyinə namizədliyini verən şəxslərin mediada yayımlanmış sloqanları ilə tanışam. Hər birinə aid olmasa da, ümumi təəssürat tələskənliyin hiss olunması ilə bağlıdır. Bu da başadüşüləndir. Seçki planlaşdırıldığı tarixdə deyil, növbədənkənar təyin olunub. Bu səbəbdən bir çoxunun prosesə hazırlıqsız qoşulduğu duyulur. Peşəkar siyasi mesaj verən sloqana hadir rast gəlinir. Hazırkı seçki sloqanlarını bir sözlə ifadə etsək, "meyxana” adlandıra bilərik. Namizədlər seçicisi ilə ünsiyyət üçün ana mesajlarını verməkdənsə, seçki vədlərini bildirməkdənsə, söz oyununa üstünlük veriblər. Hər biri olmasa da, əksəriyyət sanki millət vəkili olmaq üçün yox, ən gözəl qafiyəni kim açar yarışındadırlar.

- Yəqin ki, namizdələrin özlərini seçiciyə yaxın göstərmək niyyəti və "seçki” və "seçmək” sözləri ilə oynamaq cəhdləri ola bilər.

- Seçki sloqanı siyasi təbliğatın, eyni zamanda, namizədlə seçici arasındakı kommunikasiyanın qurulmasında əsas vasitələrdən biridir. Şüarlar hədəf auditoriyasının diqqətini çəkməli, onun yadında qalmağa kömək etməli, namizədin əsas vədini çatdırmalı və seçicini inandırmalıdır. Səslənməsinin, oxunuşunun yaradıcı olması bu funksiyaların təsirini daha da gücləndirir. Beynəlxalq təcrübədə də bu belədir ki, şüar vasitəsilə partiya və ya şəxs qalib gələcəyi təqdirdə hansı istiqamətdə işlər görəcəyi ilə bağlı mesajlar verir.

- Şüar seçici üçün əsas amillərdən biridir. Namizəd xüsusi tanınan biri deyilsə, seçici onun fotosunu, adını və şüarını görür, bunlara görə nisbətən tanıyır və səs verir.

- Hansısa nümunə seçə bilməyəcəyəm. Sadəcə onu deyə bilərəm ki, daha kiçik vədlər verən, seçicisinin maraqları ifadə olunan, seçicinin lokal xüsusiyyətləri nəzərə alınan sloqanları uğurlu hesab etmək olar.