Rəsmi Bakı İranın notasına cavab verdi

Rəsmi Bakı İranın Azərbaycana ünvanlandığı notaya cavab verib. Aprelin 4-də Azərbaycanın İrandakı  səfiri Cavanşir Axundov notaya cavabı İran hökumətinə  təqdim edib. 

Bu barədə “Yeni Müsavat”a XİN-in mətbuat xidmətinin rəhbəri Elman Abdullayev məlumat verib. Diplomatın sözlərinə görə, notada Tehranın etirazına səbəb olan, ötən həftə Bakıda Cənubi Azərbaycanla bağlı keçirilən tədbirdə səsləndirilən fikirlər Azərbaycan dövlətinin mövqeyini əks etdirmir: “Azərbaycan İranla ikitərəfli münasibətlərdə dostluq və qardaşlıq münasibətlərini əməkdaşlığın meyarı kimi dəyərləndirir. Rəsmi Bakı İran tərəfinin ikitərəfli münasbətlərin möhkəmləndirilməsi və inkişaf etdirilməsini dəstəkləməsini yüksək qiymətləndirir. Biz İranla qonşu ölkəyik. Azərbaycan daim İranın ərazi bütövlüyünü dəstəklədiyini bəyan edib. İki ölkə arasındakı münasibətlər mehriban qonşuluq şəraitində həyata keçirilir və bu münasibətlər bütövlükdə regionun inkişafına xidmət edir”. XİN rəsmisi notada analoji fikirlərin əksini tapdığını qeyd etdi.

İranlı deputatlardan birinin “Azərbaycan birləşmək istəyirsə, İrana birləşsin” məzmunlu iddia ilə çıxış etməsinə gəldikdə, E.Abdullayevin cavabı qısa oldu: “Belə absurd fikirləri şərh etmirik”.

Qaynar.info