Qaynarinfo xəbər verir ki, bunu iqtisadçı ekspert Natiq Cəfərli koronavirus pandemiyasının dünya iqtisadiyyatına vurduğu ziyandan danışarkən deyib. Onun fikrincə, virus mərəzinin ən pis tərəflərindən biri odur ki, ölkələri dalğa-dalğa vurur: 

"Bir ölkə pik nöqtəni keçən kimi digər ölkədə yayılma sürəti artır. Son həftələr dünyada diqqət İtaliya, ABŞ, Fransa və İspaniyada idi. Yaxın 2 həftədə diqqət Britaniya, Belçika, Balkanlar, Rusiya və Türkiyəyə yönələcək. Sonra Yaponiya, Skandinaviya, Belarus diqqət mərkəzinə düşəcək. Ardınca Latın Amerikası, Hindistan, Banqladeş və Afrika gündəm olacaq - bu zəhrimar virus dalğa-dalğa gedib-gəldikcə dünyada əndişə azalmayacaq, sərhədlər tam açılmayacaq.

 

Nəticədə dünya iqtisadiyyatının işə düşməsi gecikəcək. İqtisadiyyatın gec işə düşməsi dünyaya virusdan heç də az ziyan vurmayacaq - nə isə, əcəb işdi, 4 mlrd. tarixi olan Planetin sanki "sezon finalını" yaşayırıq. Sinqapurda ikinci dalğa başlandığı deyilir - bu gün karantini çox sərtləşdiriblər. Amma Vuhanda da tam sərbəsrlik veriblər - məncə, Çin virusdan çox iqtisadiyyatın daha dərin çökməsindən qorxur deyə bayram havası yaradır. Bəlkə də düz edir - bilmirəm".

Natiq Cəfərli Azərbaycanda yoluxma sayının artdığını deyib: 

"Lütfən, bütün izolyasiya və şəxsi gigiyena qaydalarına əməl edin, özünüzü və yaxınlarınızı qoruyun, görək bu işin axırı nə olacaq".