Şərqşünas alim: “Bu barədə heç kim bir ayə, istinad göstərə bilməz”

Şərqşünas alim: “Bu barədə heç kim bir ayə, istinad göstərə bilməz”

"İnsanın üzünün örtünməsi Quranda yer almır. Bu barədə heç kim bir ayə, istinad göstərə bilməz”.

Bu sözləri Qaynarinfo-ya islamda baş örtüsü və niqab məsələsinə aydınlıq gətirərkən şərqşünas-alim, Quranın Azərbaycan dilinə bədii tərcüməsinin müəllifi Nəriman Qasımoğlu deyib.

O, tarixən milli adətlərdən gələn qaydaların din adına tətbiq edildiyini qeyd edib:
 


"Açığı, bu dini məsələlərin tarixində elə şeylər çox olur. Müəyyən milli adətdən gələn qaydaları din adına tətbiq etməyə başlayırlar. Bu, demək olar ki, tək ərəb mədəniyyətində deyil, bütün mədəniyyətlərdə baş verir. Ərəblərə xas olan mədəniyyətə, onun tarixinə xas olan bir cəhətdir bu. Bəzən bu tip məsələləri şəriət, din adına rəsmiləşdirirərək, o cür də təqdim edərək dəyişməz saxlayırlar. O mənada dəyişməz ki, dini qaydaları dəyişmək olmaz”. 
Nəriman Qasımoğlu-nun sözlərinə görə, qadının üzünün örtünməsi Quranda yer almır. Bu barədə heç kim bir ayə, istinad verə bilməz. Çünki yoxdur. Niqab milli mədəniyyət məsələsindən, tarixin formalaşan, biçimlənən, gəlişən müəyyən adət-ənənələrindən irəli gəlir. Bunların bu və ya digər dərəcədə dinlə əlaqəsi olmur, amma sonradan dini örtük kimi təqdim olunmağa başlayır. Əsas səbəb budur". 

"Əgər bu mədəniyyətdən irəli gəlir və dində yoxdursa, niyə insanlara islamın şərtləri kimi qəbul elətdirilir” sualını cavablandıran alim bildirib ki, islam dinini qəbul etmiş xalqlarda bunu başqa cür qəbullandırmaq, əsaslandırmaq olmaz. Təbii ki, din adına əsaslandıraraq, Qurandan uyğun ayə tapmayıb, hədisləri dövriyəyə buraxaraq insanları inandırırlar. Onu da qeyd edim ki, hədislərin müəyyən əksəriyyətinin Quranla zidd olduğu çoxuna bəllidir”, - alim əlavə edib. 

"Baş örtüsünün tarixi hansı dövrə, hansı mədəniyyətə dayanır, bu, insanlara necə təlqin edilib, nə məqsədlə istifadə olunub” sualını cavablandıran Filologiya üzrə fəlsəfə doktoru, folklorşünas Aynur Qəzənfərqızı bildirib ki, bu haqda "Miazzez İlmiyə Çığ” qaynaqlarından geniş məlumat almaq olar: 
 


"Çoxu deyir ki, bu baş örtüsü İslamdan gəlib, Allahın əmridir, riayət olunmalıdır və s. Əslində, baş örtüsü hələ ki bizə məlum olan ilk sivilizasiya olan şumerlərin dövründən qarşımıza çıxır. Həmin dövrdə tapınaqlarda "qutsal fahişələr” deyə bir zümrə yaşayıb. Onların əsas vəzifəsi evlənən kişilərlə ilk zifaf gecəsini keçirmək idi. Buna görə də həmin qadınlar cəmiyyətdə başlarını bağlayırdılar ki, bu qədim peşəylə məşğul olan başqa qadınlardan seçilsinlər. Yəni onlar bu işi leqal ediblər. Bu örtü bir növ həmin dövrdə seksi leqallaşdırmaq rolunu oynayırdı. Daha sonra Hamurrapi hakimiyyətə gələrək əmr edir ki, bütün evli qadınlar seçilmək üçün başlarını örtsünlər. Çünki artıq fahişələrə baş örtmək yasaq edilir. Yenə burda da əslində eyni məqsəd güdülmüş olur. Bundan əlavə xristianlığın bir sektası var ki, orda da qadınlar tamamilə qara çadralara bürünməlidir. Sonrakı dövrdə islamda bu örtü özünü göstərir. Ancaq bir az mütərəqqi islam alimləri, fəqihlər belə qərara gəlib ki, İslam dinində baş örtüsü yoxdur. Çünki İslamın təməlində humanizm, qadınlara hörmət durursa, bu örtü yenidən qadının hüquqlarını bir növ əlindən alaraq, ona ancaq müəyyən məqsədlər üçün yanaşıldığını göstərməklə qadını cəmiyyətdə dəyərsizləşdirir”. 

Xatırladaq ki, dünən İçərişəhər "Cümə” məscidinin axundu Hacı Surxay Məmmədli də İslam dinində qadınların xüsusi geyimləri barədə standart formanın olmadığı demişdi: "Ümumiyyətlə, Allah qadınlar üçün "Qurani Kərim”də geyimlə, xüsusilə də hicabla bağlı bir ayədə buyurub ki, naməhrəm yerlərinizi örtün, üz və əllər istisna olmaqla. İnsan elə geyinməlidir ki, naməhrəmin diqqətini cəlb etməsin. İslam dinində qadınların xüsusi geyimləri barədə standart forma yoxdur. Din demir ki, bu geyimi mütləq geyinməlisən”. 

Günay İlqarqızı
Qaynarinfo
XƏBƏRLƏR
BLOGLAR