"Report" "News.ru"ya istinadən xəbər verir ki, forumda dövlət idarəçiliyi və biznes sahələrində protokol və işgüzar etika üzrə dünyanın aparıcı ekspertləri iştirak ediblər.

Forumun işində 1990-cı ildə Rusiya Prezidentinin Protokol Xidmətini yaratmış Vladimir Şevçenko, Rusiya Federasiyası Prezidenti yanında Heraldika Şurasının sədri Georgi Vilinbaxov və protokol və işgüzar etika sahəsində bir çox tanınmış şəxslər, müxtəlif nazirlik və idarələrin protokol xidmətlərinin rəsmiləri, regionların nümayəndələri, iri korporativ biznes strukturlarının və bank sektorunun rəhbərləri, özəl biznes sahibləri iştirak ediblər.

Bundan əlavə, foruma Azərbaycan, Argentina, Malta, İtaliya, İspaniya, Niderland, Yaponiya və digər ölkələrdən qonaqlar da qatılıblar. SOCAR-ın İctimaiyyətlə əlaqələr, protokol və tədbirlərin təşkili idarəsinin rəisi Rüfət Zamanov forumda məruzəçi qismində iştirak edib.

Forum Rusiya Milli Protokol İşçiləri Assosiasiyası tərəfindən təşkil olunub. Forumun keçirildiyi 5 il ərzində dünyanın müxtəlif ölkələrindən 200-dən çox ekspert və Rusiyanın 50 regionundan 2500 nümayəndə tədbirə qatılıb.

"Protokol Xidməti" Forumu hər il şirkətlərin bazar mövqeyi, tədbirlərin və ən yüksək səviyyəli danışıqların uğurla keçirilməsi, işgüzar mühitdə mədəniyyətlərarası əlaqələrin aktual mövzularını qaldırır. FEPS iştirakçıları protokol xidmətlərinin müasir işi üçün zəruri olan əsas alətləri, innovativ və texnoloji həlləri müzakirə edirlər. Forum böyük ölçüdə bütünlükdə sahənin inkişafının əsas istiqamətlərini müəyyənləşdirir.

Bu, hökumət rəsmilərinin, işgüzar dairələrin, rusiyalı və xarici mütəxəssislərin iştirakı ilə diplomatik və işgüzar protokol məsələlərini müzakirə etmək üçün hər il keçirilən böyük beynəlxalq tədbirdir.

Forumun açılışında Rusiyanın Xarici İşlər naziri Sergey Lavrovun təbrik məktubu oxunub.

Milli Protokol Mütəxəssisləri Assosiasiyasının prezidenti Vladimir Şevçenko protokol xidmətinin əsas missiyası barədə danışıb. Onun sözlərinə görə, bu, kifayət qədər mürəkkəb, uzun hazırlıq tələb edən peşədir.

SOCAR-ın İctimaiyyətlə əlaqələr, protokol və tədbirlərin təşkili idarəsinin rəisi Rüfət Zamanovun sözlərinə görə, protokol qaydalarına riayət etmək ayrı-ayrı dövlətlərin nümayəndələri arasında ünsiyyət məsələsində xüsusi əhəmiyyət kəsb edir: "Xüsusilə bugünkü sürətlə dəyişən dünyada danışıqlarda iştirak edənlərin tarixi, mədəni və dini xüsusiyyətlərini nəzərə almaq çox vacibdir. Həmçinin müxtəlif strukturların protokol mütəxəssisləri ilə kommunikasiyası və koordinasiyası da zəruridir".

Amma bütün cəmiyyət kimi, protokol da dəyişir və bu normal bir prosesdir. Yeni problemlər və formatlar, məsələn, tədbirlər çərçivəsində görüşlər və ya qalstuk olmadan görüşlər meydana çıxır.

Bu gün nəinki böyük korporasiyaların rəhbərləri, hətta dövlət başçıları da sosial şəbəkələrdə kifayət qədər fəaldırlar. Bu gün bu, artıq adi təcrübədir. Bu da kommunikasiyada müasir texnologiyalardan istifadəsinin göstəricisidir.

İşgüzar etiket və protokol anlayışları bir çox cəhətdən oxşardır və bir-birinə bağlıdır. Buna görə protokol və etiketi kompleks nəzərdən keçirmək daha yaxşı olardı.

Etiketdən fərqli olaraq, protokol normaları dünyanın bütün ölkələrində, demək olar, eynidir. Protokolun əsası və mahiyyəti fəxri qonağa, onun təmsil etdiyi ölkəyə və insanlara dərin hörmətin ifadəsidir.

Əlbəttə, hər bir ölkənin protokolunun öz nüansları var. Diplomatik protokol zəngin tarixə malikdir. O, qədim dövrlərdə yaranıb. Tarixdə protokol qaydaları ilə ehtiyatsız davranış səbəbilə münasibətlərdə münaqişə vəziyyətlərinin yaranmasına dair bir çox nümunə var.

"Bu gün müxtəlif ölkələrin dövlət qurumlarının, habelə kommersiya strukturlarının nümayəndələri bir-biri ilə çox fəal əlaqə qururlar və buna görə protokol normalarının tənzimlənməsinə böyük ehtiyac var", - R.Zamanov söyləyib.