Böyük Britaniyanı Tokioda keçirilmiş 2020 Yay Olimpiya Oyunlarında təmsil edib və komanda hesabında bürünc medal qazanıb. 2019-cu ildə Yeniyetmələrin Dünya Çempionatında əkiz bacısı Cesika ilə birlikdə yarışıb və gümüş medalın sahibi olub.

Bakıdan Dublinə

Cenifer 2004-cü il oktyabrın 3-də doğulub, Azərbaycan əsillidir. Atası Natiq Qədirov Azərbaycan vətəndaşıdır, anası da azərbaycanlıdır. Qədirova İrlandiyanın Dublin şəhərində anadan olub. Valideynləri 2001-ci ildə Bakıdan Londona köçüblər. 2004-cü ildə bir neçə ay iş üçün Dublində yaşayıblar. Nəticədə o və əkiz bacısı həm İrlandiya, həm də İngiltərə vətəndaşlığına sahibdir.

Babası və nənəsi Bakıda yaşayır. Nənəsi təqaüdçü uşaq həkimi, babası fizika və riyaziyyat müəllimidir. Qədirova və Cesika gimnastikaya altı yaşında başlayıb.

Britaniya və İngiltərə çempionatlarında

Cenifer Qədirova 2016-cı ildə İngiltərə çempionatında mübarizə aparıb. Müxtəlif növlərdə çıxdığı yarışlarda birinci və dördüncü yerləri tutub.

Növbəti dəfə 2018-ci ilin fevralında keçirilən İngiltərə çempionatında yarışıb və 12-ci yeri tutub. Martda isə Britaniya çempionatında müxtəlif növlər üzrə çıxdığı yarışlarda beşinci, altıncı və on doqquzuncu yerdə qərarlaşıb. Mövsümü İngiltərə Komanda Çempionatında yarışaraq başa vurub, burada gənclər arasında çoxnövçülükdə üçüncü olub.

Qədirova 2019-cu ilin mart ayında İngiltərə çempionatında mübarizə aparıb və üçüncü pilləyə qalxıb. Bundan sonra Britaniya çempionatında meydana çıxıb və çoxnövçülükdə beşinci olub. Eyni zamanda, müxtəlif növlər üzrə çıxdığı yarışlarda qızıl, gümüş və bürünc medalları aktivinə yazdırıb.

İngiltərə üçün tarixi an

Cenifer həmin ilin iyun ayında əkiz bacısı Cesika və Aliya Litlə birlikdə Macarıstanın Qor şəhərində keçirilən Gənclərin Dünya Çempionatında iştirak edib. Komanda hesabında altıncı, fərdi olaraq çoxnövçülükdə yeddinci olub. O, yarışların finalında tullanmada gümüş qazanıb, yalnız amerikalı Kayla Diçellodan geri qalıb. Xalça üzərində dördüncü, digər hərəkətlərdə isə altıncı olub. Cenifer Qədirova Gənclər arasında Dünya Çempionatında medal qazanan ilk ingiltərəli gimnast kimi adını tarixə yazdırıb.

Cenifer Qədirova həmin ilin iyul ayında İngiltərənin komanda qızılı qazanmasına kömək etdiyi Sent Kubokunda yarışıb. Sentyabr ayında ingilis klubları arasında keçirilən yarışda çoxnövçülükdə bacısından sonra ikinci yeri tutub. Noyabr ayında Fransada keçirilən Massiliya Kubokunda yarışıb, müxtəlif növlər üzrə apardığı mübarizədə qızıl və gümüş qazanıb.

Böyüklər arasında debütü

Cenifer Qədirovanın böyüklər arasında keçirilən beynəlxalq yarışlarda debütü 2020-ci ilə təsadüf edib. İlk yarışına yaralı Ameliya Morqanı əvəz etdiyi Amerika Kuboku olub. Yarışlarda Morqan Herd, Kayla Diçello (hər ikisi ABŞ-dan) və yapon Hitomi Hatakedadan sonra dördüncü olub.

Qədirova həmin ilin aprel ayında əkiz bacısı Cesika, Alisa Kinsella və Ameliya Morqanla birlikdə Avropa çempionatında Böyük Britaniyanı təmsil etmək üçün seçilib. Amma ayın sonunda kiçik zədə səbəbiylə yarışdan geri çəkilib və yerini Fibi Yakubçik tutub.

93 il sonra gələn sevinc

Cenifer Qədirova bu ililin iyun ayında bacısı Cesika, Alisa Kinsella və Ameliya Morqanla birlikdə Böyük Britaniyanı 2020 Yay Olimpiya Oyunlarında təmsil edib. Özü fərdi yarışlarda çoxnövçülükdə və Böyük Britaniya komandasının heyətində finala vəsiqə qazanıb. Cenifer Qədirova 93 ildən sonra Böyük Britaniyaya ilk olimpiya komandası medalı olan bürüncü qazanmasına kömək edib.

Mənbə: Teleqraf.com