Bu sahədə Ermənistanla əməkdaşlığa hazırıq... - Deputat

Bunu Qaynarinfo-ya açıqlamasında Milli Məclisin deputatı Elman Nəsirov işğal edilmiş torpaqlarımızın azad edilməsi uğrunda başlanan Vətən müharibəsindən keçən bir ili dəyərləndirərkən deyib.

"Keçən ilin dekabrın 2-də Azərbaycan Prezidenti, Ali Baş Komandan İlham Əliyev 27 sentyabr gününü Anım Günü elan etdi. Bu günlə bağlı Prezidentin Azərbaycan xalqına müraciəti oldu. Bu müraciətdə dövlət başçısı bir illik tarixi dövrə qiymət verdi. Xüsusilə vurğuladı ki, Azərbaycanın müzəffər Ordusu və qalib xalqımız yeni tarixi reallıq yaratdı. 44 günlük müharibənin ən mühüm nəticəsi erməni faşizmi üzərində tarixi qələbənin əldə edilməsidir. Tam qələbə qazanaraq, ərazi bütövlüyümüzü, suverenliyimizi bərpa etmişik. Qarşımızda növbəti vəzifə dayanıb. İşğaldan azad edilmiş ərazilərimizin bərpası ilə bağlı tarixi missiya. Bu istiqamətdə də ciddi işlər gedir. Qarabağın bərpası işlərinə bir il üçün 2,2 milyard manat vəsait ayrılıb. Füzuli Hava Limanı artıq işə salınıb. Bir sözlə, bölgədə böyük infrastruktur layihələri həyata keçirilir. Habelə insanların tarixi Vətənlərinə qayıdışı istiqamətində ciddi işlər görülür”. 

E. Nəsirov qeyd edir ki, indiki məqamda qarşıda dayanan əsas məsələlərdən biri bütün qüvvələri sərəfbər edib torpaqlarımızın tam şəkildə işğaldan azad olunması məqsədinə nail olmaqdır. Bu istiqamətdə konkret nəticələrə hesablanan ciddi işlər gedir:

"Qarşıda postmüharibə dövrünün həllini gözləyən məsələlər var. Bununla bağlı Azərbaycan prinsipial və qətiyyətli mövqeyə malikdir. Bu sahədə Ermənistanla əməkdaşlığa hazırıq. Amma təssüf ki, hələlik İrəvan tərəfdən müsbət impuls yoxdur. Böyük sülh müqaviləsinin imzalanmasını istəyirik. O sülh müqaviləsini ki, hər iki tərəf bir-birinin ərazi bütövlüyünü, sərhədlərin toxunulmazlığını tanısın. İqtisadi əlaqələr və kommunikasiyalar bərpa olunmalı, Zəngəzur dəhlizi işə salınmalıdır. İrəvan hələlik buna adekvat cavab verməyib. Amma başqa yolları da yoxdur. Paşinyan hökuməti açıq və gizli şəkildə müəyyən mesajlar verib. Türkiyə ilə əlaqələrin bərpasından danışıb. Ermənistan psixoloji təzyiq altındadır. Onların regionda sülh və təhlükəsizliyin təminatına getməkdən başqa çıxış yolları yoxdur. İrəvanın bundan başqa alternativ yolu yoxdur. Alternativ yol üçüncü Qarabağ savaşıdır ki, bu isə Ermənistanın sonunun başlanğıcı olardı”.