Yay sona yaxınlaşdıqca diqqətlər qarşıdakı payız mövsümünün trendlərinə yönəlir. Cari mövsümdə klassik geyimlər fərqli motiv və naxışlarla tamamlanıb. Yayın sonlarında müşahidə olunan dəb nümunələri isə parlaq rənglərin payızda da aktuallığını qoruyacağını göstərir.

Son günlərdə Kopenhagendə keçirilən 2027-ci ilin yaz mövsümünə həsr olunmuş Moda Həftəsinin iştirakçıları parlaq və təzadlı rənglərdə geyimlərə üstünlük veriblər. Xüsusilə qiymətli daşları xatırladan canlı çalarlar ön plana çıxıb. Kral mavisi və qırmızı rənglərin bir araya gətirilməsi təzadlı görünüş yaradıb.

Payız üçün səciyyəvi isti çalarlar daha parlaq qiymətli daş tonları ilə uzlaşdırılıb. Qara ipək kimi payız qarderobunun klassik elementləri ilə birləşdirilən bu rənglərə həm podiumda, həm də küçə dəbində tez-tez rast gəlinib.

Parlaq rənglər yalnız Kopenhagen küçələrində deyil, Los-Ancelesdə keçirilən qırmızı xalça mərasimlərində və Nyu-Yorkdakı təqdimat tədbirlərində də diqqət çəkib. Bir sıra məşhurlar da geyim seçimlərində parlaq rənglərə üstünlük veriblər.

Ötən çərşənbə axşamı Nyu-Yorkda “Ted Lasso” serialının dördüncü mövsümünün premyerasına qatılan Cuno Templ (Juno Temple) həm Y2K üslubunun yenidən aktuallaşmasını, həm də parlaq rənglərə marağı əks etdirən geyim seçib. “Emmy” mükafatına namizəd göstərilmiş aktrisa Tom Fordun “Gucci”yə rəhbərlik etdiyi dövrə aid 2003-cü ilin yaz kolleksiyasından libas geyinib.

Eyni model libası 2003-cü ildə Cennifer Lopez (Jennifer Lopez) “Gigli” filminin premyerasında geyinib. Templ isə Lopezin şokolad-qəhvəyi rəngli libasından fərqli olaraq, eyni modelin tünd firuzəyi çalardakı variantına üstünlük verib. Libas dərin V formalı dekoltesi və korset üslublu biçimi ilə seçilib.

Cuno Templ kimi Monika Barbaro (Monica Barbaro) da “One Night Only” turnesi çərçivəsində parlaq rəngli geyimə üstünlük verib. O, “Troxopulu” tərəfindən hazırlanmış qısa minidres geyinib. Qırmızı və ağ üfüqi zolaqlar optik effekt yaradıb, geyimin əsas diqqətçəkən xüsusiyyəti isə parlaq rəng seçimi olub.

2026-cı ilin payız kolleksiyaları qarşıdakı mövsüm üçün bir sıra trendləri ön plana çıxarıb. Şişirdilmiş proporsiyalar, damalı naxışlar və tünd yarpaq motivləri podiumlarda nümayiş etdirilib. “Celine”, “Prada”, “Balenciaga” və “Akris” kimi brendlərin kolleksiyalarında açıq çəhrayı və qırmızı rənglərdə cəsarətli dizaynlar təqdim olunub.

2025-ci ilin iyununda keçirilən 2026-cı ilin yaz kolleksiyalarının təqdimatlarından sonra alıcılar dizaynerlərin rəng seçimlərini müsbət qiymətləndiriblər. “Dior” və Villi Çavariyanın (Willy Chavarria) kolleksiyalarında parlaq və ifadəli rənglərdən geniş istifadə olunub. Kopenhagen Moda Həftəsində nümayiş etdirilən küçə dəbi, məşhurların son geyim seçimləri və əvvəlki mövsümlərdə müşahidə olunan tendensiyalar parlaq rənglərin payızda da aktuallığını qoruyacağını göstərir.