Şarl Mişel Aİ ölkələrini genişlənməyə hazırlaşmağa çağırdı

Qaynarinfo "Financial Times"a istinadən xəbər verir ki, bu barədə Avropa İttifaqı Şurasının prezidenti Şarl Mişelin Sloveniyanın Bled şəhərində XVIII Beynəlxalq Strateji Forumun açılışındakı çıxışının layihəsində deyilir.

"Əgər bizə etibar edilməsini istəyiriksə, vaxt haqqında danışmalıyıq. Aİ-nin növbəti strateji gündəliyini hazırlayarkən biz dəqiq hədəf qoymalıyıq. Biz hər iki tərəfdən 2030-cu ilə qədər genişlənməyə hazır olmalıyıq. İndi biz genişlənməni əsas vəzifələrimizdən biri hesab etməliyik. Həm Aİ, həm də onun gələcək üzv dövlətləri üçün”, - Mişelin nitq layihəsində deyilir.

FT-nin məlumatına görə, Avropa İttifaqının genişlənməsi ilə bağlı ilk iclas oktyabrın əvvəlində İspaniyanın Qranada şəhərində keçiriləcək. Görüş zamanı Aİ ölkələrinin liderləri bütün namizəd ölkələrə maliyyə dəstəyi verəcək birliyin büdcəsinin doldurulması imkanlarını da müzakirə etmək niyyətindədirlər. 

"Bu, iddialıdır, lakin zəruridir. Bu, ciddi olduğumuzu göstərir. Fürsət pəncərəsi açıqdır. Biz buna uyğun hərəkət etməliyik”, - Avropa Şurasının rəhbəri çıxışında vurğulayıb.

Xatırladaq ki, Albaniya, Moldova, Şimali Makedoniya, Serbiya, Türkiyə, Ukrayna və Monteneqro hazırda Aİ üzvlüyünə rəsmi namizədlərdir. Türkiyə 2005-ci ildən bəri Aİ-yə üzvlüklə bağlı ən uzun danışıqlar aparan ölkədir, Monteneqro isə 2010-cu ildən namizəd statusundadır. Ukrayna 2022-ci ilin fevral ayının sonunda Aİ-yə üzvlük üçün müraciət edib. İyun ayında Aİ ölkələrinin liderləri Ukrayna və Moldovaya ittifaq üzvlüyünə namizəd statusunun verilməsini təsdiqləyiblər.