Rusiya ilə Ukrayna arasındakı müharibə fonunda İsveçrə ölkəni "getdikcə daha qeyri-sabit" beynəlxalq mühitə hazırlamağa yönəlmiş yeni milli təhlükəsizlik strategiyası qəbul edib.
Qaynarinfo xəbər verir ki, yeni strategiyada İsveçrə hakimiyyəti üç əsas prioritet müəyyənləşdirib: dövlətin, iqtisadiyyatın və cəmiyyətin dayanıqlılığının gücləndirilməsi; mülki əhalinin, dövlət qurumlarının və kritik infrastrukturun müdafiəsinin yaxşılaşdırılması; eləcə də müdafiə qabiliyyətinin artırılması.
"Anadolu" agentliyinin məlumatına görə, İsveçrə hökuməti beynəlxalq təhlükəsizlik vəziyyətinin qeyri-sabit və dəyişkən xarakter aldığını bildirib. Hökumətin açıqlamasında Rusiya ilə Ukrayna arasındakı müharibənin hazırda başa çatacağının görünmədiyi, kiberhücumların, təsir əməliyyatlarının və digər hibrid təhdidlərin sayının artdığı qeyd olunub.
İsveçrə hökuməti ölkənin təhlükəsizlik sahəsində yaranan risklərə cavab verməli olduğunu hesab edir.
Yeni strategiyanın 10 məqsəd və 46 tədbirdən ibarət olduğu bildirilir. Sənəddə hökumətin daha ehtimal olunan hesab etdiyi təhdidlərə, o cümlədən hibrid hücumlara və ölkə daxilində mütəşəkkil cinayətkarlığa qarşı mübarizəyə üstünlük verilir.
Müdafiə məsələləri ilə bağlı hakimiyyət bildirib ki, İsveçrə silahlı hücuma effektiv şəkildə qarşı çıxmaq imkanına malik olmalıdır. Bunun üçün lazımi potensialın əvvəlcədən yaradılması və tərəfdaş ölkələrlə əməkdaşlığın qurulması nəzərdə tutulur.
İsveçrə Rusiyaya qarşı Avropa İttifaqının tətbiq etdiyi sanksiyalara qoşulub. Bu qərar ölkənin ənənəvi neytrallıq siyasəti ilə bağlı ciddi müzakirələrə səbəb olub.
Mühüm addımlardan biri 15–16 iyun 2024-cü ildə Bürgenştokda Qlobal Sülh Sammitinin keçirilməsi olub. Sammitdə 90-dan çox ölkə və beynəlxalq təşkilatın nümayəndələri iştirak edib. Tədbirdə Ukrayna ilə bağlı gələcək sülh prosesinin prinsipləri müzakirə olunub.
Lakin Bernin sülh təşəbbüsləri ilə bağlı mövqeyi hər zaman Kiyevin mövqeyi ilə tam üst-üstə düşməyib. 2024-cü ilin sentyabrında Ukrayna Xarici İşlər Nazirliyi İsveçrənin Çin-Braziliya sülh təşəbbüsünü dəstəkləmək qərarından məyus olduğunu bildirib. Ukrayna tərəfi həmin təşəbbüsün Kremlin göstərişləri əsasında hazırlandığını iddia edib.
İsveçrə müharibə səbəbindən ölkəni tərk edən ukraynalıları qəbul etməyə də davam edir. 2026-cı ildə ölkə ukraynalılar üçün müvəqqəti müdafiə statusunun qüvvədəolma müddətini 2028-ci ilin martına qədər uzadıb. Bununla yanaşı, yeni müraciət edənlər üçün qaydalar dəyişdirilib.
Aydın
Şərhlər