Amerikalı hərbçilər 2026-cı ilin yazında Yaxın Şərqdə Çin gəmisinə qarşı əməliyyat keçirməyə az qala başlayıblar. Buna səbəb süni intellektin köməyi ilə hazırlanmış və yanlış məlumatlar ehtiva edən kəşfiyyat hesabatının əldə olunması olub.

Qaynarinfo xəbər verir ki, bu barədə CNN vəziyyətlə tanış olan dörd mənbəyə istinadən yazıb.

Hadisə ABŞ-ın İranla müharibəsi fonunda baş verib. Amerikalı hərbçilər arasında yayılan hesabatda Çin gəmisinin nüvə silahı komponentləri daşıdığı iddia olunub. Məlumat dərhal həyəcan yaradıb və bundan sonra hərbçilər gəmini ələ keçirməyə hazırlaşmağa başlayıblar.

CNN-in mənbələrinin sözlərinə görə, silahlı amerikalı hərbçilər gəmiyə çıxmağa hazırlaşır, hərbi təyyarələr isə artıq havada olub. Vəziyyət yalnız əməliyyatın başlanmasına az qalmış dəyişib. Həmin vaxt rəsmilər məlumatın mənşəyini daha ətraflı yoxlayıblar.

Məlum olub ki, hesabatı xüsusi əməliyyatlar komandanlığının analitiki süni intellekt çat-botundan istifadə edərək hazırlayıb. Məhz süni intellekt Çin gəmisindəki yükün xarakterini səhv müəyyənləşdirib. CNN hansı yükün yanlış identifikasiya edildiyini müəyyən edə bilməyib.

Mənbələrdən biri hazırlanmış sənədi "tamamilə yanlış" adlandırıb. Lakin səhvin nəticələri daha ciddi ola bilərdi. Nəşrin həmsöhbətinin sözlərinə görə, bu səhv "az qala müharibəyə səbəb olmuşdu". ABŞ-ın Çin gəmisinə qarşı keçirəcəyi istənilən əməliyyat Vaşinqtonla Pekin arasında sonrakı eskalasiyaya səbəb ola bilərdi.

CNN-in məlumatına görə, analitik əvvəlcə ABŞ-ın Sakit Okean Xüsusi Əməliyyatlar Komandanlığından daxil olan gəmi manifesti ilə bağlı kəşfiyyat məlumatlarını təhlil etməyi çat-botdan istəyib. Çat-bot açıq mənbələrdəki məlumatları radioelektron kəşfiyyat vasitəsilə əldə edilmiş kəşfiyyat məlumatları ilə birləşdirib və bundan sonra yük barədə yanlış nəticəyə gəlib.

Daha sonra analitik əldə olunan nəticələri standart kəşfiyyat hesabatı formasına salmaq üçün yenidən süni intellektdən istifadə edib. Sənəd hərbi rəsmilər arasında yayılıb və onlar bu materialı adi, yoxlanılmış analitik hesabat kimi qəbul edə biliblər.

Hadisə ABŞ Silahlı Qüvvələrində süni intellektin genişmiqyaslı tətbiqi fonunda baş verib. Texnologiyadan böyük həcmdə kəşfiyyat məlumatlarının təhlili, zərbələr üçün hədəflərin seçilməsi, logistika və digər vəzifələrdə istifadə olunması planlaşdırılır. Yanvar ayında ABŞ-ın müdafiə naziri Pit Heqset süni intellektin sürətlə tətbiqinə dair strategiyanı təqdim edib.

Bununla yanaşı, CNN-in məlumatına görə, hərbi və kəşfiyyat sahələrində süni intellektdən istifadə hələ də mərkəzləşdirilməyib. Müxtəlif bölmələr fərqli sistemlərdən istifadə edir və fərqli təhlükəsizlik qaydalarına əməl edirlər. Belə alətlər tərəfindən yaradılan məlumatların yoxlanılması üçün vahid standart mövcud deyil.

CNN-in mənbələrinin sözlərinə görə, süni intellektin sistemin yanlış məlumat yaratdığı və "hallüsinasiya" adlandırılan halları artıq ABŞ kəşfiyyat icmasında da baş verib. Bəzi rəsmilər kəşfiyyat məlumatlarının hazırlanmasını sürətləndirmək cəhdlərinin səhvlərin sayını artıra biləcəyindən narahatdırlar.

Nəşrin həmsöhbətlərindən biri bildirib: "Süni intellekt pis ideyaya daha tez çatmağa imkan verir".

Aydın