Azərbaycanın Britaniyadakı yeni səfirliyinin açılışında COP29 izdihamı (FOTOLAR)

İyulun 25-də COP29-un müəyyən olunmuş Prezidenti, Azərbaycan Respublikasının ekologiya və təbii sərvətlər naziri Muxtar Babayevin iştirakı ilə keçirilən tədbirə Britaniyanın Enerji Təhlükəsizliyi və Sıfır Emissiya məsələləri üzrə Dövlət katibi Ed Miliband, beynəlxalq iqlim və enerji naziri Kerry McCarthy, Britaniyadakı diplomatik korpusun marşalı Alistair Harrison, COP26-nın Prezidenti, Britaniya parlamentinin Lordlar Palatasının deputatı  Alok Şarma, Britaniya Baş nazirinin Azərbaycan üzrə keçmiş Ticarət elçisi Baronessa Nikolson, parlamentarilər Baronessa Uddin, Bob Bləkmən, Lord Maknikol, Britaniyadakı diplomatik korpus nümayəndələri, o cümlədən Londondakı diplomatik korpusun duayeni – Hondurasın Britaniyadakı səfiri İvan Romero Martinez, həmçinin COP Sədrlikləri  Troykasına daxil olan Braziliya və Birləşmiş Ərəb Əmirliklərinin Londondakı səfirləri, The City of Londondan yüksək vəzifəli nümayəndələr, Commonwealth Millətlər Birliyi Təşkilatının Londondakı qərargahının təmsilçiləri, Britaniya xarici işlər nazirliyi və Britaniyanın Enerji Təhlükəsizliyi və Sıfır Emissiya Nazirliyinin əməkdaşları, BP şirkətinin istehsalat və əməliyyatlar üzrə vitse prezidenti Gordon Birrell, Səfirliyin yerləşdiyi Londonun Kensington və Chelsea Bələdiyyəsinin üzvləri, Britaniyada fəaliyyət göstərən çoxsaylı iqlim mütəxəssisləri və sairə şəxslər iştirak ediblər. 

Açılışda çıxış edən Azərbaycanın Britaniyadakı səfiri Elin Süleymanov Azərbaycanın Britaniyadakı səfirliyinin yeni inzibati binasında keçirilən ilk rəsmi tədbirin COP29-a həsr olunmasının olduqca mötəbər hadisə olduğunu və bu vacib tədbirdə COP29-un müəyyən olunmuş Prezidenti, Azərbaycan Respublikasının ekologiya və təbii sərvətlər naziri Muxtar Babayev və Britaniyanın Enerji Təhlükəsizliyi və Sıfır Emissiya məsələləri üzrə Dövlət katibi Ed Milibandın iştirak etməsinin rəmzi məna daşıdığını deyib. Səfir ilin sonuna doğru COP29-a ev sahibliyi edəcək Azərbaycanın diqqətinin tam şəkildə iqlim fəaliyyətinə yönəldiyini və ölkəmizin bütün dünya üçün həyati əhəmiyyət daşıyan iqlim məqsədlərinin irəli aparılması üçün əlindən gələni etdiyini bildirib. E.Süleymanov bu məsuliyyətli işdə ilk gündən Azərbaycana dəstəyini əsirgəməyən Britaniya tərəfinə təşəkkür ifadə edib. 

Elin Süleymanov, həmçinin bir neçə gün öncə Oksford şəhərində keçirilən Avropa Siyasi Birliyinin zirvə görüşü zamanı Britaniyanın Baş naziri Keir Starmer tərəfindən Azərbaycan Respublikasının Prezidenti İlham Əliyevə göstərilən qonaqpərvərliyə, eləcə də Britaniyanın xarici işlər naziri David Lammy ilə Azərbaycan Respublikasının xarici işlər naziri Ceyhun Bayramov arasında keçirilən səmimi görüşə görə Britaniya tərəfinə minnətdarlıq edib. Səfir ölkəmizin Britaniyanın Azərbaycan və Ermənistan arasında normallaşma prosesinə töhfə vermək istiqamətində səylərini yüksək qiymətləndirdiyini deyib.  

Daha sonra COP29-un müəyyən olunmuş Prezidenti, Azərbaycan Respublikasının Ekologiya və Təbii Sərvətlər naziri Muxtar Babayev çıxış edib. Bir neçə gün öncə Azərbaycan Respublikasının Prezidenti cənab İlham Əliyevin Avropa Siyasi Birliyinin zirvə görüşündə iştirak etmək üçün Britaniyaya işçi səfər etməsinə istinad edən nazir Azərbaycanın Britaniyadakı səfirliyinin yeni binasında keçirilən COP29-a həsr olunmuş tədbirdə həm də ikitərəfli dostluq münasibətlərinin qeyd olunduğunu vurğulayıb. Londonun iqlim fəaliyyətində vacib mərkəz rolu oynadığını vurğulayan M.Babayev iyun ayının sonlarında London İqlim Fəaliyyəti Həftəsində iştirak üçün Britaniyaya baş tutan səfəri zamanı keçirdiyi görüşlər və iştirak etdiyi təbdirlərdən söz açıb. Bu xüsusda o, Millətlər Birliyi Təşkilatının Baş qərargahında kiçik ada dövlətlərinin səfirləri ilə keçirilmiş görüşə toxunaraq bu dövlətlərdə iqlim dəyişikliyinin mənfi nəticələrinin aradan qaldırılmasına yardım məqsədi ilə Azərbaycanın adıçəkilən təşkilatla yaxından əməkdaşlıq etdiyini qeyd edib. COP26-nın ev sahibi olmuş Britaniyanın olduqca vacib tərəfdaş olduğunu deyən M.Babayev Britaniyalı həmkarlara Azərbaycanda keçiriləcək COP29 tədbirinin uğurlu keçməsi istiqamətində göstərdikləri dəstəyə görə təşəkkür edib. Londona hazırkı səfəri çərçivəsində dayanıqlı bazarlar təşəbbüsünün müzakirə edilməsi üçün özəl sektor və maliyyə institutları ilə rəsmi görüşlər keçirəcəyini deyən COP29-un müəyyən olunmuş prezidenti M.Babayev ölkəmizin COP29 çərçivəsində gördüyü işlər və irəli sürülən təşəbbüslərdən danışıb. 

Britaniyanın Enerji Təhlükəsizliyi və Sıfır Emissiya məsələləri üzrə Dövlət katibi Ed Miliband öz çıxışında Azərbaycanın Britaniyadakı səfirliyinin yeni binasının ilk rəsmi tədbirində iştirak etməkdən şərəf duyduğunu bildirib. Ed Miliband iqlim dəyişikliyinin qarşısının alınması və dünyanın yaşıl inkişafı üçün dünya ölkələrini bir araya gətirən COP tədbirlərinin olduqca əhəmiyyətli olduğuna inandığını qeyd edib. Dövlət katibi indiyədək keçirilmiş COP görüşlərində razılaşdırılmış tədbirlərin davam etdirilməsinin, habelə COP29-da iqlim maliyyələşməsi məsələsi üzrə vacib razılığa gəlinməsinin iqlim məqsədlərinin təmin edilməsi baxımından mühüm əhəmiyyət daşıdığını qeyd edib. Bu kontekstdə o, iqlim problemlərindən ən çox əziyyət çəkən ölkələrə dəstək verilməsinin önəminə diqqət çəkib. Britaniyanın dövlət katibi öz çıxışında dəfələrlə vurğulayıb ki, Britaniya tərəfi COP29-un uğurla keçməsi və gözlənilən nəticələrin əldə olunması üçün ölkəmizə hər bir dəstəyi verməyə və Azərbaycanla yaxından tərəfdaşlıq etməyə hazırdır. 

Tədbir zamanı Azərbaycan Prezidenti İlham Əliyevin Britaniyanın Baş naziri Keir Starmerə COP29-da iştirakla bağlı ünvanladığı dəvət məktubunun original nüsxəsi Britaniyanın Enerji Təhlükəsizliyi və Sıfır Emissiya məsələləri üzrə Dövlət katibi Ed Milibanda təntənəli surətdə təqdim edilib.  

Tədbirdə iştirak edən The City of  Londonun merinin rəsmi nümayəndəsi, Alderman Greg Jones də çıxış edərək dünyanın maliyyə və biznes mərkəzi olan The City-nin COP29-un uğurla keçməsinə hər bir dəstəyi verməyə hazır olduğunu qeyd edib. 

Tədbir ziyafətlə davam edib. 

Qeyd edək ki, Azərbaycanın Britaniyadakı səfirliyinin binasının açılışı ilə əlaqədar keçirilən bu tədbir Azərbaycan - Britaniya ikitərəfli əlaqələri tarixində ilk dəfə olaraq Britaniya kabinetinin ən yüksək ranklı nazir vəzifəsində olan dövlət rəsmisinin - Dövlət katibinin Azərbaycanın Britaniyadakı səfirliyində keçirilən tədbirdə iştirak etməsi ilə yadda qalıb.