Vladimir Putin sonuncu dəfə Soçiyə yeddi ay əvvəl uçub. Putin hətta may ayında qeyd etdiyi Alina Kabayevanın ad gününə Soçiyə gəlmək ənənəsini də kəsib.

Qaynarinfo xəbər verir ki, bu barədə "Proyekt”in təhlilində deyilir.

Nəşrin prezidentlə tanış olan mənbəsi bunu dövlət başçısının şəhərdə olan hədəflərə PUA-ların hücumundan sonra həyatı üçün qorxması ilə izah edib.

Prezidentin ictimaiyyət qarşısında çıxışlar cədvəlinə əsasən, 2024-cü ildə Putin Soçidə yalnız bir görüş keçirib - martın 6-da MAQATE rəhbəri Rafael Qrossi ilə. O vaxtdan bəri o, Krasnodar diyarının Qara dəniz sahillərində görünməyib, baxmayaraq ki, bu ilə qədər yaz və payızın əhəmiyyətli hissəsini Soçidə keçirib.

Putin Qrossi ilə görüşdən əvvəl rəsmi olaraq 2023-cü ilin payızında Soçiyə gəlib - noyabrın 28-də o, Ümumdünya Rusiya Xalq Şurasının iştirakçılarını videobağlantı vasitəsilə salamlayıb və yeni tibb müəssisələrinin açılışını edib. Ertəsi gün Putin "Sirius” mərkəzində gənc alimlərlə görüşüb.

2023-cü ildə Putin prezidentin cədvəlinə uyğun olaraq "Boçarov Ruçey” iqamətgahında rekord miqdarda vaxt keçirib. Kremlin.ru saytındakı məlumata görə, o, Soçidə rəsmi olaraq cəmi səkkiz gün qalıb, pandemiyadan əvvəl isə Soçidə ildə 30 və ya daha çox gün keçirə bilirdi. "Proyekt”in təhlilinə görə, Putin Soçidə ən çox may ayında və "məxməri mövsümdə” - sentyabr, oktyabr və noyabr aylarında vaxt keçirib.

2020-ci ildə Putin, ehtimal ki, Soçidə Kremlin bildirdiyindən daha çox yaşayıb. "Proyekt”in əvvəllər yazdığı kimi, pandemiya zamanı Rusiya prezidenti üçün Novo-Oqarevodakı iqamətgahda kabinetinin bənzəri "Boçarov Ruçey” iqamətgahında tikilib. Bu, Putinin Soçidə özünü təcrid etmək, eyni zamanda Moskvada işləmək görüntüsü yaratmaq üçün edilib.

2023-cü ilin sentyabr-oktyabr aylarında Ukrayna PUA-larının Soçiyə hücumları başlayıb. Sentyabrın 30-dan oktyabrın 1-nə keçən gecə PUA-lardan biri Soçi hava limanının ərazisinə düşüb və helikopter meydançasını zədələyib. Daha bir hücum oktyabrın 14-də baş verib. Bu hücumlar arasında Putin Soçiyə uçub, burada digər məsələlərlə yanaşı, Abxaziya "prezidenti” Aslan Bjaniya ilə görüşüb və Valday klubunun plenar iclasında çıxış edib.

Rəsmilər Putinin Soçidə çox vaxt keçirmək vərdişinin dəyişdiyinə diqqət yetiriblər. Onlar bunu öz aralarında müzakirə edirlər və daha Soçidəki görüşlərə dəvət edilmədiklərinə təəccüblənirlər, prezidentin dostu "Proyekt”ə bildirib.

"Prezident həyatı üçün qorxmağa başlayıb və buna görə də cənuba uçmağı dayandırıb", deyə Putinlə tanış olan nəşrin mənbəsi bildirib.

2024-cü ildə Putin, ən azı 2012-ci ildən başlayan ənənəsini pozaraq hətta Alina Kabayevanın ad günü üçün belə Soçiyə uçmayıb. Adətən Rusiya prezidenti Soçiyə mayın 10-11-də, Qələbə paradı və "Ölməz alay” yürüşündən dərhal sonra gəlirdi. İstisna 2020-ci ildir: Putinin bu zaman Soçidə olması ilə bağlı heç bir məlumat yoxdur.

Nizami Bağırov