Qarderobu səliqəyə salarkən hansı əşyalardan imtina etməyin lazım olduğunu müəyyənləşdirmək çətin ola bilər. Bu, xüsusilə geyimlərə aiddir. Çünki dəb dövridir və bu gün köhnəlmiş kimi görünən geyimlər bir müddət sonra yenidən aktuallaşa bilər.

Qaynarinfo xəbər verir ki, bu barədə “Martha Stewart” portalı yazır.

Dəri gödəkçə

Stilistlər keyfiyyətli dəri gödəkçədən tələsik imtina etməməyi məsləhət görürlər. Zaman keçdikcə material daha yumşaq ola bilər, üzərində yaranan xarakterik köhnəlmə izləri isə onun görünüşünün bir hissəsinə çevrilə bilər.

Keyfiyyətli pencək

Pencəklərin siluetləri dəyişsə belə, yaxşı tikilmiş modellər universal olaraq qalır. Əgər geyim bir qədər köhnəlmiş görünürsə, onu atmaq əvəzinə atelyedə dəyişdirmək, məsələn, biçimini və ya düymələrini yeniləmək olar.

Keyfiyyətli cins geyim

Sevimli cins şalvarınız bədəninizə yaxşı oturursa, stilistlər onu saxlamağı məsləhət görürlər. Cins geyimlərin biçimi və çalarları vaxtaşırı dəbdən düşür və sonra yenidən dəbə qayıdır. Mütəxəssislər buna 1970-ci illərdə məşhur olan genişlənən balaqlı və yüksək belli cins şalvarların yenidən dəbə qayıtmasını nümunə göstərirlər.

Ağ köynək

Klassik ağ köynək müxtəlif geyimlərlə asanlıqla uyğunlaşır və bir çox vəziyyət üçün münasibdir. Stilist Tara Vest onu müxtəlif əhval-ruhiyyə və şəraitə uyğunlaşdırıla bilən bir növ “təmiz kətan” adlandırıb. Bununla belə, köynək yaş və ya istifadə nəticəsində saralmayıbsa və formasını itirməyibsə, onu qarderobda saxlamağa dəyər.

Klassik trençkot

Trençkot müxtəlif mövsümlərdə geyinilə bilən və həm gündəlik, həm də iş geyimləri ilə uyğunlaşdırılan universal qarderob elementidir. Əgər fason köhnəlmiş görünürsə, stilistlər əşyanı atmaq əvəzinə biçimini dəyişməyi və ya astarını yeniləməyi məsləhət görürlər.

2000-ci illərin aksessuarları

Metal kəmərlər, strazlı çantalar və 2000-ci illərin əvvəllərinə aid bəzi strukturlaşdırılmış cins modellər yenidən işə yaraya bilər. Dizayner Kadim Alfonso Fayff belə əşyalar ifadəli görünürsə, lakin kostyumu xatırlatmırsa, onları saxlamağı məsləhət görür.

Eyni zamanda, o, bir parlaq aksessuarı daha müasir obrazla birləşdirməyi tövsiyə edir.

Kombinasiya paltarı

Xüsusilə 1990-cı illərlə assosiasiya olunan bu fason yenidən qarderobun universal elementinə çevrilib. Stilist Stefani Kultress O'Nil qeyd edir ki, belə paltarlar müxtəlif variantlarda dəfələrlə dəbə qayıdıb – 1990-cı illərin minimalist modellərindən maili biçimli romantik fasonlara qədər.

Belə paltarı ilin müxtəlif fəsillərində geyinmək olar. Məsələn, payızda onu boğazlı sviter və qalın ayaqqabı ilə, yayda isə zinət əşyaları və sandallarla birləşdirmək təklif olunur.

Aydın