Mövsüm bitən kimi "Sabah”dan ayrılan futbolçulardan biri Slavik Alxasov oldu. Sonuncu dəfə mart ayında meydana çıxan Alxasov komandadan getməsi haqda fikirlərini bölüşüb.

Onun Qaynarinfo-ya müsahibəsini təqdim edirik:

- Klubla yollarınız nə üçün ayrıldı? Özünüz getmək istəyirdiniz, yoxsa baş məşqçinin "gözünə girə” bilmədiniz?

- Müqaviləmin müddəti bitmişdi. Son 6-7 oyunda meydana çıxmırdım. Amma məşqçi ilə münasibətlərim yaxşı idi, həmişə söhbət edirdim. 2-3 dəfə mənə yaxınlaşıb komandada qalmağımı istədiyini demişdi. Amma sonda rəhbərliyin qərar verəcəyini bildirmişdi. Ən yaxşı variant ayrılmaq idi. Çünki oynamaq istəyirdim. Oynamayanda düz gəlmir. İnşallah, 2-3 günə, maksimum bir həftəyə yeni komandam bilinər.

- Belə uzun müddət oynamamaq sizi həvəsdən salmamışdı ki? Məşqlərə qoşulurdunuz?

- Əlbəttə, məşqlərin hamısına qoşulurdum. 100 faizdən də çox məşq edirdim. Hamının mənimlə münasibəti yaxşı idi. Həvəsdən düşmək kimi söz-söhbətlər ola bilməzdi. Çünki müqavilə var və onun haqqını verməlisən.

- Müqavilənin haqqını tam verə bildiniz? Bununla bağlı nə düşünürsünüz?

- Bacardığımın ən yaxşısını etdim. Yəni, meydana çıxmamağım o demək deyil ki, mən zəif məşq edirdim, yaxud oynamırdım. Sadəcə, belə alındı.

- Sonuncu dəfə 20-ci turda "Səbail”lə oyunda meydana çıxmışdın. Nə zaman başa düşdünüz ki, ayrılmaq vaxtıdır?

- Mənim üçün önəmli olan oynamaq idi. Son oyunlarda şans qazanmırdım. Bir də müqaviləm bitirdi. Ona görə ən yaxşı variant komandadan getmək idi.

- Dediniz ki, baş məşqçi komandada qalmağınızı istəyirdi. Belədirsə, niyə bu qədər müddət ərzində sizi meydana buraxmırdı? Hər halda komandanın ən təcrübəli üzvlərindən sayılırdınız.

- Onu Musayevdən soruşsanız, yaxşı olardı. Məşqçinin fikrinə hörmətlə yanaşırdım. Başqa heç bir problem yox idi.

- Yəni, heyətə düşməməkdə özünüzdə də günah görürdünüz?

- Məşqləri yaxşı yerinə yetirməsəydim və intizamım yerində olmasaydı, özümdə günah görərdim. Yəqin ki, sırf məşqçinin fikri idi.

- "Sabah”da baş məşqçi dəyişikliyi olandan sonra komanda ardıcıl uğursuzluqlardan sonra daha yaxşı çıxış etməyə başladı və mövsümü 5-ci pillədə bitirdi. Yəni, göründü ki, Murad Musayev Ramin Quliyevdən daha bacarıqlı məşqçidir. Bəs Musayev komandada nələri dəyişməyi bacardı?

- Ramin Quliyevin vaxtında da komanda ötən mövsümü 5-ci yerdə yerdə bitirmişdi. Hər məşqçinin öz oyun üslubu var. Yəni mən kimin yaxşı və ya pis olduğunu deyə bilmərəm. Mənim üçün ikisi də yaxşı idi.

- "Sabah”ın avrokuboklara vəsiqə qazanması üçün nə çatmadı? Əsas səhvlər nə oldu? Mövsümün əvvəlindən daha yaxşı oynamaq mümkün idi?

- Avrokuboklara vəsiqəyə xal çatmadı. "Sumqayıt”la evdə 2:2 etdiyimiz oyun həlledici oldu. Qələbə qazansaydıq, bəlkə də şansımız qalırdı.

Səbuhi Həsənov