"Meta" “Instagram”, “Facebook”, “WhatsApp” və “Meta AI” xidmətlərini birləşdirən “Meta One” adlı yeni abunə sistemini istifadəyə verib.
Qaynarinfo şirkətə istinadən xəbər verir ki, xidmət süni intellekt imkanlarını genişləndirir və istifadəçilərə əlavə fərdiləşdirmə, yaradıcılıq və peşəkar alətlər təqdim edir.
“Meta One” çərçivəsində istifadəçilər “Meta AI”dan daha geniş istifadə edə, daha çox şəkil və video yarada və mövcud görüntüləri süni intellekt vasitəsilə redaktə edə biləcəklər. Xidmət yaradıcılar və bizneslər üçün də əlavə alətlər təqdim edir.
50-dən çox funksiya
"Meta"nın məlumatına görə, yeni sistem istifadəyə verildiyi vaxt artıq 50-dən çox ödənişli funksiya təqdim edir. Şirkət gələcəkdə “Meta One” imkanlarını “Edits” tətbiqinə və süni intellektli eynəklərinə də genişləndirməyi planlaşdırır.
Abunə qiymətləri
“Meta One” qlobal şəkildə mərhələli olaraq istifadəyə verilir. Ayrı-ayrı məhsullar üçün abunəliklər ayda 2,99 dollardan, fərdi paketlər 7,99 dollardan, yaradıcı və biznes paketləri isə 14,99 dollardan başlayır. Daha geniş biznes paketlərinin qiyməti ayda 499 dollara qədər yüksələ bilir.
"Meta" bildirir ki, “Instagram”, “Facebook”, “WhatsApp” və “Meta AI”ın əsas funksiyaları əvvəlki kimi pulsuz qalacaq. Meta One əlavə imkanlardan və daha geniş süni intellekt istifadəsindən yararlanmaq istəyən istifadəçilər üçün nəzərdə tutulub.
Şirkətin açıqlamasına görə, “Meta One”un müxtəlif planları üzrə artıq 15 milyon abunəlik və sınaq istifadəsi qeydə alınıb.
Şəbnəm İbrahimxəlilova
Şərhlər