Texnologiyaların sürətli inkişafı həkimlərin malik olduğu bacarıqların təxminən üçdə birinin aktuallığını itirməsinə səbəb ola bilər.
Qaynarinfo xəbər verir ki, bu barədə Rusiyanın Səhiyyə Nazirliyinin V.A. Almazov adına Milli Tibbi Tədqiqat Mərkəzinin baş direktoru Yevgeni Şlyaxto Kazan Digital Week forumunda danışıb.
Onun sözlərinə görə, süni intellektin inkişafı ilə yanaşı, məlumatların emalı, şəbəkələr və kibertəhlükəsizlik sahəsində biliklərin əhəmiyyəti artacaq. Bununla belə, yeni texnologiyalarla işləyən mütəxəssislər üçün yaradıcı düşüncə, çeviklik və öyrənməyə maraq da daha vacib olacaq.
Şlyaxto hesab edir ki, gələcəkdə şirkətlər əməkdaşların bacarıqlarını yeniləməyə və yeni kompetensiyalara malik mütəxəssislər cəlb etməyə çalışacaqlar. Buna görə də təhsil sistemi dəyişən əmək bazarının tələblərinə uyğunlaşmalıdır.
O bildirib ki, süni intellekt hazırda insanların qavrayış, düşünmə və ünsiyyət imkanlarını genişləndirən vasitə kimi çıxış edir. Gələcəkdə isə onun sadəcə informasiya mənbəyi deyil, mütəxəssislərin qarşılıqlı əlaqədə işləyə biləcəyi komanda üzvü kimi istifadə olunması önəm qazanacaq.
Aydın
