“Microsoft” şirkətinin həmtəsisçisi Bill Qeyts hesab edir ki, süni intellektin sürətli inkişafı fonunda yalnız bir neçə peşəyə tələbat sabit qalacaq. Bu arada “Microsoft” süni intellekt infrastrukturu sahəsinə investisiyalar fonunda 60 min əməkdaşına könüllü olaraq işdən ayrılmağı təklif edir.
Qaynarinfo xəbər verir ki, bu barədə “LADbible” nəşri yazır.
Neyron şəbəkələri əmək bazarını getdikcə daha fəal şəkildə dəyişdirir, şirkətləri işə qəbul və işin təşkili ilə bağlı yanaşmalarını yenidən nəzərdən keçirməyə məcbur edir. Bu fonda Bill Qeytsin texnologiyalarla əvəzlənməsi ən çətin olacaq peşələr barədə proqnozu yenidən müzakirə olunur.
Sahibkarın fikrincə, gələcəkdə dörd istiqamət xüsusilə tələb olunan sahələr olaraq qalacaq: proqramlaşdırma, biologiya, energetika və peşəkar idman.
Süni intellektin inkişafına baxmayaraq hansı peşələr qorunub saxlanılacaq?
Kod yazmaq üçün süni intellekt alətlərinin inkişafına baxmayaraq, mürəkkəb sistemlərin yaradılması və təkmilləşdirilməsi üçün proqramçılara ehtiyac qalacaq. Bioloqlar elmi tədqiqatlarla məşğul olacaq, energetika sahəsinin mütəxəssisləri isə enerji infrastrukturunun inkişafını və fəaliyyətini təmin edəcəklər.
Peşəkar idman digər istiqamətlərdən fərqlənir. Bu sahədə fiziki qabiliyyətlər, ustalıq və yarışların tamaşaçılar üçün cəlbediciliyi mühüm rol oynayır. Qeyts teleaparıcı Cimmi Fellonla söhbətində qeyd edib ki, insanların kompüterlərin beysbol oynamasını izləmək istəyəcəyi ehtimalı azdır.
Bununla yanaşı, sahibkar gələcəkdə əksər işlərin yerinə yetirilməsi üçün insan əməyinə ehtiyac qalmaya biləcəyini ehtimal edir. Malların istehsalı, daşınması və ərzaq məhsullarının yetişdirilməsi zaman keçdikcə əhəmiyyətli dərəcədə avtomatlaşdırılacaq.
“SpaceX” şirkətinin qurucusu İlon Mask isə hesab edir ki, növbəti onillik ərzində robotların sayı ən azı bir milyarda çatacaq və onların məhsuldarlığı bütün bəşəriyyətin ümumi məhsuldarlığını üstələyəcək.
“Əvvəlcə bu proses çox yavaş gedəcək, lakin zaman keçdikcə artım partlayış xarakteri alacaq”, deyə İlon Mask G20 sammitində bildirib.
Süni intellektin təsirinə ən çox məruz qala biləcək peşələr
Ötən il “Microsoft” süni intellekt tərəfindən əvəzlənmə ehtimalı ən yüksək olan 40 peşənin siyahısını dərc edib.
Siyahıya aşağıdakı peşələr daxil edilib:
1. Tərcüməçilər və şifahi tərcüməçilər.
2. Tarixçilər.
3. Təyyarə bələdçiləri və turist qruplarını müşayiət edən şəxslər.
4. Xidmət sahəsində satış nümayəndələri.
5. Müəlliflər və yazıçılar.
6. Müştəri dəstəyi xidməti əməkdaşları.
7. Rəqəmsal proqramla idarə olunan dəzgahların proqramçıları.
8. Telefon operatorları.
9. Kassirlər, dəmir yolu və aviasiya işçiləri.
10. Radio aparıcıları və diktorlar.
11. Broker şirkətlərinin kargüzarları.
12. Ev təsərrüfatı və fermerlik üzrə kursların əməkdaşları.
13. Televiziya ticarəti üzrə satıcılar.
14. Konsyerjlər.
15. Politoloqlar və siyasi analitiklər.
16. Xəbər analitikləri, jurnalistlər və müxbirlər.
17. Riyaziyyatçılar.
18. Texniki mətn müəllifləri.
19. Korrektorlar və mətn tərtibatçıları.
20. Xidmət göstərən köməkçi personal.
21. Redaktorlar.
22. Ali təhsil müəssisələrində biznes fənlərini tədris edən müəllimlər.
23. İctimaiyyətlə əlaqələr üzrə mütəxəssislər.
24. Məhsul nümayişçiləri və təşviqatçılar.
25. Reklam agentləri.
26. Yeni hesabların açılması üzrə menecerlər.
27. Statistika üzrə assistentlər.
28. İcarə və kirayə xidmətləri üzrə menecerlər.
29. Məlumat elmi üzrə mütəxəssislər (Data Scientists).
30. Şəxsi maliyyə məsləhətçiləri.
31. Arxiv işçiləri.
32. Ali təhsil müəssisələrində iqtisadiyyat müəllimləri.
33. Veb-tərtibatçılar.
34. İdarəetmə üzrə analitiklər.
35. Coğrafiyaçılar.
36. Modelləşdirmə mütəxəssisləri.
37. Bazar analitikləri.
38. Təcili xidmətlərin çağrı mərkəzi operatorları.
39. Kommutator operatorları.
40. Ali təhsil müəssisələrində kitabxana işi üzrə müəllimlər.
“Microsoft”un qiymətləndirməsinə görə, ağır texnika operatorları, ev təmizliyi ilə məşğul olan işçilər, dam ustaları, masajçılar, qabyuyanlar, tibb bacıları və digər bəzi peşələr daha təhlükəsiz mövqedədir.
Beləliklə, aşağı maaşlı və fiziki əməyə əsaslanan peşələrin avtomatlaşdırılma ehtimalı intellektual fəaliyyətlə bağlı peşələrlə müqayisədə xeyli aşağı ola bilər.
Süni intellektə investisiyalar gözlənilən nəticəni verirmi?
Süni intellektin əmək bazarına təsiri ilə bağlı müzakirələr davam edərkən, bu texnologiyaya investisiya qoyan şirkətlərin üzləşdiyi çətinliklər də diqqət çəkir.
Bir araşdırmanın nəticələrinə görə, süni intellektə vəsait yatıran şirkətlərin 95 faizi investisiyalarından iqtisadi fayda əldə edə bilməyib. Əsas problemlərdən biri hazır süni intellekt alətlərinin biznes tapşırıqlarına uyğunlaşdırılmasının çətin olmasıdır.
Süni intellektdən gözlədikləri nəticəni ala bilməyən bəzi şirkətlər əvvəllər işdən çıxardıqları əməkdaşları yenidən işə götürməyə başlayıblar. Bu, avtomatlaşdırmanın hələlik insanları gözlənilən miqyasda tam əvəz edə bilmədiyini göstərir.
Bundan əlavə, süni intellektin tətbiqi infrastruktur, təhlükəsizlik və məlumatların emalı kimi sahələrə ciddi investisiyalar tələb edir. Bu xərclər isə çox vaxt ilkin proqnozları üstələyir.
Aydın
