Cinayətkarlar dələduzluq qurbanlarının pul verməyə daha asan razılaşması üçün qohum və dostlarının səslərini, eləcə də üzlərini təqlid etmək məqsədilə süni intellektdən istifadə edirlər.
Qaynarinfo xəbər verir ki, bu barədə “The Independent” nəşri məlumat yayıb.
Nəşr qeyd edir ki, süni intellekt vasitəsilə yaradılan dərin saxtakarlıq (deepfake) zənglərinin, mesajların və videoların texnoloji baxımdan təkmilləşməsi tanış səsə, üzü tanınan şəxsə, hətta telefon ekranında görünən nömrəyə etibar etməyi çətinləşdirir.
“UK Finance” təşkilatının bu ilin əvvəlində dərc etdiyi hesabata görə, 2025-ci ildə dələduzlar təxminən 1,3 milyard funt sterlinq oğurlayıblar.
Məqalədə diqqət yetirilməli bir sıra təhlükəli əlamətlər sadalanır. Bunlara qarşı tərəfin təcili hərəkət etməyi tələb etməsi, baş verənləri gizli saxlamağı istəməsi, pul, bank köçürməsi, hədiyyə kartı, parol və ya birdəfəlik təsdiq kodu tələb etməsi daxildir.
Yeni telefon nömrəsi və ya hesabdan edilən zəng də şübhə doğurmalıdır. Əgər şirkət və ya bank sizə yeni nömrədən zəng edirsə, danışığı dayandırmaq və əvvəlcədən bildiyiniz nömrəyə özünüz zəng etmək lazımdır.
“Əgər, məsələn, bank nümayəndəsi olduğunu iddia edən biri sizə zəng edirsə, kartınızın arxasında göstərilən nömrəyə zəng edin”, – deyə nəşr tövsiyə edir.
Belə hallarda ailə üzvlərinin kimliyini yoxlamaq üçün ailə daxilində xüsusi “kod sözü” və ya internetdə paylaşılmamış məlumatla bağlı ümumi yoxlama sualı müəyyənləşdirmək məsləhət görülür.
Əgər maliyyə dələduzluğu ilə qarşılaşmısınızsa, bu barədə banka məlumat verin və rəsmi şikayət təqdim edin. Həmçinin dələduzların adından istifadə etdiyi şəxslə əlaqə saxlayın ki, həmin şəxs başqalarını da xəbərdar edə bilsin.
Aydın
