“Intel” şirkəti yaddaş qurğularının bahalaşmasının kompüter bazarına mənfi təsirinin 2027-ci ilin ilk yarısında da davam edəcəyini gözləyir. Şirkətin ilin son rübü üçün açıqladığı gəlir və mənfəət proqnozları analitiklərin gözləntilərindən aşağı olub.
Qaynarinfo xəbər verir ki, bu barədə “CHIP” nəşri məlumat yayıb.
“Intel” 2026-cı ilin dördüncü rübündə 15-16 milyard dollar gəlir əldə etməyi planlaşdırır. Halbuki analitiklər bu göstəricinin 17,07 milyard dollar olacağını proqnozlaşdırırdılar. Şirkətin səhm başına düzəliş edilmiş mənfəət gözləntisi isə 25 sentdir. Analitiklərin proqnozu 43 sent təşkil edirdi.
Kompüter satışları azalır, süni intellekt gəlirləri artır
“Intel”in üçüncü rüb üzrə maliyyə nəticələri şirkətin iki əsas istiqaməti arasında fərqi üzə çıxarıb. Kompüter prosessorlarını əhatə edən bölmənin gəliri ötən ilin eyni dövrü ilə müqayisədə 5 faiz azalaraq 8,1 milyard dollara düşüb.
Bunun əksinə, məlumat mərkəzləri və süni intellekt istiqamətində gəlirlər 78 faiz artaraq 7,3 milyard dollara çatıb. Şirkətin ümumi gəliri isə 21 faiz yüksələrək 16,5 milyard dollar təşkil edib.
“Intel”in maliyyə direktoru Devid Zinsner kompüter bazarındakı zəifliyin ən azı 2027-ci ilin ilk yarısınadək davam edəcəyini gözlədiklərini bildirib.
Şirkət server prosessorlarına artan tələbatı qarşılamaq üçün istehsalı genişləndirməyə çalışır. Lakin istehsal gücünün məhdud olması müştərilərə çatdırıla bilən prosessorların sayına təsir edir.
Fabrikdəki partlayış gəlir proqnozunu aşağı salıb
Oktyabr ayında İsrailin Kiryat-Qat şəhərində yerləşən “Intel” zavodunda baş verən partlayış istehsalın iki həftə dayandırılmasına səbəb olub. Zinsnerin sözlərinə görə, bu fasilə şirkətin dördüncü rüb üzrə gəlir proqnozunu təxminən 300 milyon dollar azaldıb.
“Intel” 2027-ci ilin ilk rübündə də oxşar maliyyə itkisi ilə üzləşə biləcəyini ehtimal edir. Hazırda şirkət istehsal etdiyi çiplərdən hansılarının istifadə oluna biləcəyini araşdırır. Bu qiymətləndirmə istehsaldakı fasilənin növbəti aylara təsirini də müəyyənləşdirəcək.
Şirkət istehsala daha çox vəsait yatırmağı planlaşdırır
“Intel” iyul ayında 2026-cı il üçün kapital xərcləri proqnozunu 18 milyard dollardan 20 milyard dollara yüksəldib. Şirkət istehsal imkanlarını genişləndirmək məqsədilə 2027-ci ildə investisiyaları daha da artırmağı nəzərdə tutur.
Bundan başqa, “Intel” avqust ayında səhm satışından 23 milyard dollar vəsait cəlb edib. Digər şirkətlər üçün çip istehsalı istiqamətini böyütmək baş icraçı direktor Lip-Bu Tanın şirkəti yenidən inkişaf yoluna qaytarmaq planının əsas hissələrindən biridir.
Aydın
