Dünya 15:15 29.11.2023

Belarus rəsmən ŞƏT-ə üzv oldu

Belarus prezidenti Aleksandr Lukaşenko parlamentdə razılaşdırılmış respublikanın Şanxay Əməkdaşlıq Təşkilatına (ŞƏT) üzv olmaq öhdəlikləri haqqında memorandumu imzalayıb.

Qaynarinfo xəbər verir ki, bu barədə Belarus Respublikasının milli hüquqi internet portalında müvafiq qanun dərc edilib.

"2023-cü il iyulun 4-də Yeni Dehlidə imzalanmış Şanxay Əməkdaşlıq Təşkilatına üzv dövlət statusunun alınması üçün Belarus Respublikasının öhdəlikləri haqqında Memorandum ratifikasiya edilsin”, deyə sənəddə qeyd edilir.

Belarus hökumətinə "Belarus Respublikasının Memorandumda iştirakını rəsmiləşdirmək üçün zəruri tədbirlər görmək” tapşırılıb.

"İnterfaks" xəbər verir ki, memorandumun ratifikasiyası Belarusun təşkilata üzv olması üçün zəruri şərt kimi ŞƏT-ə üzv dövlətlər tərəfindən müəyyən edilib.

Xüsusilə, Belarus ŞƏT Nizamnaməsinin məqsəd və prinsiplərinə, təşkilata üzv dövlətlərin uzunmüddətli mehriban qonşuluq, dostluq və əməkdaşlıq haqqında sazişin müddəalarına, həmçinin ŞƏT çərçivəsində qəbul edilmiş beynəlxalq müqavilələrə və sənədlərə əməl etməyi öhdəsinə götürür. 

Respublika memorandumda müəyyən edilmiş müddətlərdə ŞƏT çərçivəsində qəbul edilmiş bütün beynəlxalq müqavilələrə və sənədlərə qoşulmağı öhdəsinə götürür.

Memorandum Belarus vətəndaşlarının ŞƏT-in daimi orqanlarında kvota vəzifələrinin tutulması qaydasını, habelə respublikanın təşkilata daxil olmasının maliyyə aspektlərini müəyyən edir.

Xüsusilə, Belarusun ŞƏT-ə üzv olması üçün təşkilatın büdcəsinə hər il töhfə verilməsi tələb olunacaq. Belarusun ŞƏT-in büdcəsində payı 5,8% təşkil edəcək.

Nizami Bağırov