Başqasının sözünü kəsmək əksər hallarda nəzakətsizlik və ya hörmətsizlik kimi qiymətləndirilir. Lakin psixoloqlar bildirirlər ki, bu davranışın arxasında çox vaxt şəxsiyyət xüsusiyyətləri, uşaqlıqdan formalaşmış ünsiyyət vərdişləri və hətta nevroloji amillər dayanır.

Qaynarinfo egeszsegkalauz.hu-ya istinadən xəbər verir ki, mütəxəssislərin fikrincə, insanların söz kəsməsi hər zaman qarşı tərəfə hörmətsizlik etmək niyyətindən irəli gəlmir. Bəzən onlar fikirlərini unutmaqdan ehtiyat etdikləri və ya söhbətə dərhal qoşulmaq istədikləri üçün bunu qeyri-iradi şəkildə edirlər.

Psixoloqlar qeyd edirlər ki, uşaqlıqda yalnız yüksək səslə və ya başqalarından tez danışaraq öz fikrini ifadə edə bilən insanlar bu davranış modelini yetkin yaşlarında da davam etdirə bilərlər. Belə hallarda söz kəsmək şüurlu seçimdən daha çox avtomatik vərdişə çevrilir.

Araşdırmalara görə, söhbət zamanı insan beyni passiv olmur. Qarşı tərəf danışarkən beyin eşitdiklərini təhlil edir, əvvəlki təcrübələrlə əlaqələndirir və eyni zamanda cavab hazırlayır. Bu səbəbdən bəzi insanlar fikirlərini qarşı tərəf cümləsini bitirməmiş ifadə etməyə meylli olurlar.

Mütəxəssislər bildirirlər ki, bütün söz kəsmələr eyni xarakter daşımır. Bəzən bu, söhbətə maraq və həvəsdən irəli gəlir. Lakin bir şəxs davamlı olaraq başqalarının fikrini tamamlamasına imkan vermir, söhbəti daim öz üzərinə yönəldirsə, bu artıq ünsiyyət balansını poza bilər.

Psixoloqların sözlərinə görə, bəzi hallarda tez-tez söz kəsmək diqqət çatışmazlığı və hiperaktivlik pozuntusu (DEHB) ilə də əlaqəli ola bilər. DEHB-li şəxslər fikirlərini unutmaqdan qorxduqları üçün növbələrini gözləməkdə çətinlik çəkə bilirlər. Bununla belə, mütəxəssislər vurğulayırlar ki, təkcə bu davranışa əsasən heç kim özünə diaqnoz qoymamalıdır.

Araşdırmada onlayn görüşlərə də toxunulub. Bildirilir ki, videozənglər zamanı internet bağlantısındakı kiçik gecikmələr və qeyri-verbal ünsiyyətin məhdud olması səbəbindən iştirakçıların eyni vaxtda danışmağa başlaması daha tez-tez müşahidə olunur. Bu isə əksər hallarda qəsdən edilən davranış hesab edilmir.

Mütəxəssislər xəbərdarlıq edirlər ki, davamlı şəkildə başqalarının sözünü kəsmək zamanla münasibətlərə mənfi təsir göstərə, qarşı tərəfdə dinlənilmədiyi və fikirlərinə dəyər verilmədiyi hissini yarada bilər. İş mühitində isə bu, komanda daxilində fikir mübadiləsini zəiflədə və əməkdaşların aktivliyini azalda bilər.

Psixoloqlar hesab edirlər ki, aktiv dinləmə öyrənilə bilən bacarıqdır. Qarşı tərəfin fikrini tam ifadə etməsinə imkan vermək, cavab verməzdən əvvəl qısa fasilə etmək və diqqəti həqiqətən dinləməyə yönəltmək ünsiyyətin keyfiyyətini artırır və münasibətləri möhkəmləndirir.

Onların fikrincə, tez-tez söz kəsmək əksər hallarda sonradan qazanılmış davranışdır və şüurlu şəkildə üzərində işləməklə bu vərdişi dəyişmək mümkündür. Əgər bu problem ailədə, işdə və ya sosial münasibətlərdə davamlı münaqişələr yaradırsa, psixoloqa müraciət etmək faydalı ola bilər.

Günay