İnsan nə qədər yaşlı və maddi baxımdan imkanlıdırsa, süni intellektə və onun potensial imkanlarına münasibəti bir o qədər müsbət olur. Gənclər isə ən pessimist yaş qrupudur.
Qaynarinfo-nun məlumatına görə, "Public First" şirkətinin "Politico" üçün keçirdiyi sorğu göstərib ki, süni intellektə ən mənfi münasibət 18–24 yaşlı insanlar arasındadır. Onları xüsusilə texnologiyanın müstəqil düşünmə qabiliyyətinə təsiri və karyera perspektivləri narahat edir.
Bununla yanaşı, süni intellektdən istifadə səviyyəsi yüksək olaraq qalır. Gənclər təhsil, iş və şəxsi məsələlərlə bağlı ağıllı çat-botlardan getdikcə daha çox istifadə edirlər. Lakin onların bu texnologiyalara emosional münasibəti daha ehtiyatlı olur.
35–44 yaş qrupu ilə müqayisə bunu aydın göstərir. Bu yaşda olan insanlar süni intellektdən gənclər qədər fəal istifadə etsələr də, onun gələcək perspektivlərinə daha müsbət yanaşırlar.
18–24 yaşlı respondentlərin yalnız 19 faizi süni intellektin həm şəxsi imkanlarını yaxşılaşdıracağını, həm də cəmiyyətə fayda verəcəyini düşünür. 35–44 yaş qrupunda isə bu fikri bölüşənlərin payı 28 faizdir.
Maddi vəziyyət də münasibətə təsir edir
Bütün yaş qruplarında özünü tam maddi təminatlı hesab edən insanların 43 faizi süni intellektin onların vəziyyətini daha da yaxşılaşdıracağını və eyni zamanda cəmiyyətə fayda verəcəyini gözləyir.
Ən az maddi imkanlara sahib olan, yəni zəruri ehtiyaclarını qarşılamaq üçün kifayət qədər pulu olmayan insanlar arasında bu fikirdə olanların payı cəmi 18 faizdir. Onların 51 faizi isə süni intellektin həm şəxsi vəziyyətlərinə, həm də bütövlükdə cəmiyyətə mənfi təsir göstərəcəyini düşünür.
Araşdırmanın müəllifləri qeyd edirlər ki, sorğunun nəticələri maddi qeyri-sabitliklə süni intellektə mənfi münasibət arasında birbaşa əlaqəni sübut etmir. Bununla belə, nəticələr mühüm tendensiyanı göstərir: gənclər əmək bazarına yenicə daxil olur və yaşlı nəsillərin artıq əldə etdiyi maliyyə və peşə sabitliyinə malik deyillər.
Bu səbəbdən süni intellektlə bağlı narahatlıqlar gənclərin onsuz da mövcud olan qeyri-müəyyənlik hissi ilə üst-üstə düşür.
Eyni qanunauyğunluq gələcəklə bağlı gözləntilərdə də müşahidə olunur. Respondentlərin maddi təminatı nə qədər yüksəkdirsə, süni intellektin gələcəkdə onların iqtisadi vəziyyətinə təsirini bir o qədər optimist qiymətləndirirlər.
Aydın
Şərhlər