Altı ay ərzində dünyadan təcrid olunan Alyaska şəhəri: İnsanlar orda necə yaşayır? (VİDEO)

Oliviya Cons adlı qadının ailəsi – həyat yoldaşı və dörd övladı – hər il bu ehtiyatların alınmasına 4 min dollar xərcləyir. Çünki qışda onların yaşadığı şəhərə gedən yol keçilməz olur.

Qaynarinfo xəbər verir ki, bu barədə “Adevarul” yazır.

Söhbət uzaq ərazidə yerləşən və 100-dən az insanın yaşadığı İql şəhərindən gedir. Şiddətli şaxtalar başlayanda mağazaya adi səfərlər mümkün olmur. Buna görə də ailə sentyabr ayında ət, kərə yağı, pendir, xama və digər uzun müddət saxlanıla bilən ərzaqları bir neçə ay üçün əvvəlcədən alır.

Oliviya lazımi ərzaq miqdarını “Excel” cədvəlindən istifadə etməklə hesablayır. O, ehtiyatları aylar üzrə bölüşdürür və məhsulların bir hissəsini fövqəladə hallar üçün saxlayır.

Bununla belə, İql sakinləri qış aylarında tamamilə təcrid olunmurlar. Həftəiçi günlərdə poçt təyyarəsi qəsəbəyə uçaraq lazımi ərzaqları çatdıra bilər. Lakin bu üsul xeyli baha başa gəlir, çünki çatdırılmanın qiyməti yükün çəkisindən asılıdır.

Mağazalardan və bahalı hava nəqliyyatından daha az asılı olmaq üçün Cons ailəsi ərzaqların bir hissəsini özü yetişdirir. Ailə öz torpaq sahəsində kartof, kahı, şalğam və kələm yetişdirir. Bundan əlavə, ailə ovçuluqla da məşğul olur. Ov zamanı əldə edilən ət qış boyunca əlavə qida mənbəyinə çevrilir.

Qadının sözlərinə görə, bütün bunlar ərzaq çatışmazlığı yarandığı hallarda ailəsinin vəziyyətin öhdəsindən gəlməsinə kömək edir.

İql sakinləri yolsuz altı ayı necə keçirirlər

Qışda şəhərdə temperatur sıfırdan xeyli aşağı düşə, gün işığının müddəti isə çox qısa ola bilər. Buna baxmayaraq, İqldə qış aylarında həyat dayanmır. Məktəblər fəaliyyət göstərir, sakinlər bir-birinin evinə qonaq gedir, oyun gecələri təşkil edir, xizək və kirşələrdən istifadə edir, birlikdə vaxt keçirirlər.

“Bizim çox sərt qışlarımız olur, temperatur mənfi göstəricilərə düşür və aylarla günəş görünmür. Buna görə də birlikdə olmaq və vaxtı bir-birimizlə keçirmək çox vacibdir”, deyə Oliviya bildirib.

Aydın