Uqanda ilk baxışdan qonşularından elə də fərqlənməyən adi Afrika ölkəsi təsiri bağışlaya bilər. Lakin burada minilliklər boyu insanların təsəvvürünü məşğul edən bir məkan yerləşir.

Qaynarinfo CNN-ə istinadən xəbər verir ki, müasir səyahətçilər Uqandada buzlaqlarla örtülü dağlardan tropik meşələrə qədər çoxsaylı gözəl mənzərələrlə qarşılaşa bilərlər. Ölkənin tarixində isə Nil çayı xüsusi yer tutur. Müasir Uqanda ərazisi uzun müddət dünyanın ən uzun çayının mənbəyinin yerləşdiyi ərazi hesab edilib.

Nilin mənbəyinin axtarışı minilliklər boyu davam edib. Hələ qədim Misir krallıqları dövründə Nil boyunca hərbi yürüşlər təşkil edilir və çayın mənbəyini tapmağa çalışırdılar. XIX əsrdə isə Nilin mənbəyini axtarmaq avropalı tədqiqatçılar arasında əsl vəsvəsəyə çevrildi. Tacirlər, missionerlər və səyyahlar çayın axınını izləməyə çalışırdılar. Lakin qədim misirlilər kimi, onlar da bataqlıqlar və çay astanaları ilə qarşılaşırdılar.

Nəhayət, Nilin mənbəyi Uqandanın ərazisində, Cinca şəhərinin yaxınlığında, Viktoriya gölündə yerləşən Ripon şəlaləsi elan edildi. Lakin sonradan vəziyyətin daha mürəkkəb olduğu məlum oldu. Nil sistemi Ruanda və Burundiyə qədər uzanan çoxsaylı qollardan ibarətdir. Bununla belə, məhz Cinca yaxınlığında Viktoriya gölündən Ağ Nilin güclü axını başlayır.

Bu gün həmin məkanın ilkin görünüşü əhəmiyyətli dərəcədə dəyişib. 1954-cü ildə tamamlanan su elektrik stansiyası şəlalələrin böyük hissəsini su altında qoyub. 2012-ci ildə isə Bujagali bəndi raftinq həvəskarları arasında məşhur olan astanaların bir hissəsini su altında gizlədib. Köhnə Ripon şəlaləsindən yalnız üzərində nişan olan kiçik bir ada, suvenir mağazası və turistlərin foto çəkdirməsi üçün platforma qalıb.

CNN-in məlumatına görə, Cinca həmçinin aktiv istirahət üçün başlanğıc nöqtəsinə çevrilib. Burada raftinq, bencicampinq və çayın daha sakit hissələrində qayıq gəzintiləri təklif olunur. Yaxınlıqda isə digər təbii görməli yerlər yerləşir.

Uqandanın digər təbii görməli yerləri

Onlardan biri Konqo Demokratik Respublikası ilə sərhəddə yerləşən, qarla örtülü Rvenzori dağlarıdır. Burada Afrikanın üçüncü ən hündür zirvəsi olan Stenli dağı yerləşir. Milli parkda meşə filləri, antiloplar və digər nadir heyvanlar yaşayır.

Kampala ilə Cinca arasında təxminən 115 kvadrat mil ərazini əhatə edən Mabira meşəsi yerləşir. Burada 310 növ ağac bitir. Yerli bələdçi Şalif Vanqubonun sözlərinə görə, bu, Viktoriya gölü hövzəsinin ən böyük meşə massividir. Qanunsuz ağac kəsilməsinin qarşısını almaq üçün məhv olmaq təhlükəsi ilə üzləşən ağacların gövdələrində rəssamlar insan üzləri çəkməyə başlayıblar.

Təbiətin yerli inanclarla sıx şəkildə əlaqələndiyi daha bir məkan Ssezibva şəlaləsidir. Rəvayətə görə, Ssezibva və Mubeya adlı iki su axını əkizlər kimi yaranıb. Rəvayətə əsasən, ilan ruhunun yaşadığı mağaranın yaxınlığında insanlar ona yerli qəhvə dənələrindən hazırlanmış təqdimlər qoyurlar.

Aydın