"Dovşan ili" qalmaqalı YAP-da hiddətə səbəb oldu: "Bu, partiyaya qarşı təxribatdır"

Partiyanın Təftiş Komissiyasının sədri Musa Musayev Qaynarinfo-ya bildirib ki, bu məlumat məqsədli şəkildə dövriyyəyə buraxılıb. 

"Şərur rayon təşkilatının sədrinin elə cavab verdiyinə inanmıram. Bu düzülüb-qoşulmuş söhbətə oxşayır. Təbii ki, bu məsələ araşdırılacaq və əsl həqiqət üzə çıxacaq. Hesab edirəm ki, bu məlumat Yeni Azərbaycan Partiyasına qarşı təxribatdır”, deyə Musa Musayev əlavə edib.

Bəs bu təxribatı kimlər törədə bilər? Musa Musayev bu barədə konkret heç nə deyə bilməyəcəyini bildirib: "Konkret ad çəkmək, ünvan göstərmək əlbəttə ki, çətindir. Amma bu məlumat sözsüz ki, Naxçıvandan yayılıb”.

Naxçıvanla bağlı müəyyən proseslərin getdiyi bir ərəfədə hakim partiyanın nüfuzuna xələlə gətirəcək belə bir məlumatın yayılması bəzi mülahizələrə səbəb olub. Ehtimal olunur ki, məlumat Naxçıvan MR Ali Məclisinin keçmiş sədri Vasif Talıbovun ətrafı tərəfindən ortaya atıla bilər. Bu məlumatdan bir neçə gün əvvəl Vasif Talıbovun YAP-ın Naxçıvan MR təşkilatının sədri vəzifəsindən çıxarıldığı barədə məlumat yayılmışdı. Ardınca isə mediada onun YAP İdarə Heyətinin üzvlüyündən də çıxarıla biləcəyi xəbəri yer aldı. Güman edilir ki, bu məlumat Vasif Talıbovla bağlı addımlara cavabdır.