Böyük Britaniyada yaşayan və 2019-cu ildə “Loto” lotereyasında 134 milyon avro məbləğində cekpot qazanan qadın sərvətinin təxminən yarısını xeyriyyə işlərinə bağışladığını və bu qərarından peşman olmadığını bildirib.

Qaynarinfo xəbər verir ki, bu barədə “HotNews” yazıb.

Söhbət Frensis və onun həyat yoldaşı Pedi Konollidən gedir. Cütlük uduşdan sonra “PFC Trust” xeyriyyə fondunu təsis edib və onun vasitəsilə İngiltərənin şimal-şərqində bir sıra ictimai layihələrə dəstək verib.

“Milli Lotereyadan pulları aldıqları xoşbəxt gündən etibarən cütlük qazandıqları məbləğin təxminən yarısını digər insanlara verdiklərini hesablayıb”, - deyə materialda qeyd olunub.

Keçmiş müəllimə və sosial işçi olan Frensis bildirib ki, multimilyonçu olmamışdan xeyli əvvəl də ətrafındakı insanlara kömək edib. Onun sözlərinə görə, insanlar adətən kifayət qədər vəsaitə sahib olduqlarını düşündükdə əllərində olanı başqaları ilə bölüşürlər.

“Bu, həyatda nəyə can atmağınızdan asılıdır. Əgər məqsədiniz dünyanın ən varlı insanı olmaq və prezidentlərə təsir göstərməkdirsə, o zaman bütün pulları və ya ən azı onların əhəmiyyətli hissəsini özünüzdə saxlamalısınız. Amma heç nəyi bölüşməyən heç kimi tanımıram. Hesab edirəm ki, insan kifayət qədər imkan əldə etdiyi səviyyəyə çatdıqda paylaşmaq onun təbiətində var. Hər kəs üçün “kifayət qədər” anlayışı fərqlidir”, - deyə Konolli bildirib.

Qadın əsas mükafatı qazandığı vaxt 50 yaşdan yuxarı olduğunu və ailəsinin onsuz da rahat və təminatlı həyat sürdüyünü nəzərə alaraq böyük sərvət toplamağın mənasını görmədiyini söyləyib.

Pul hesablarında olsa da, cütlük təvazökar həyat tərzini davam etdirdiyini bildirib. Əri plastik istehsalı sahəsində ailə biznesində işləməyə davam edir, onlar isə dəbdəbəli alış-verişlərə yol vermirlər. Həmçinin “Cartier” saatı və “Aston Martin” avtomobili kimi işlənmiş əşyalar alıblar.

“Bizim gözəl həyatımız var. Mən həmişə insanlara deyirəm ki, eyni cür yaşayırıq, sadəcə daha yüksək səviyyədə. Bilirsiniz, dostlarımla danışsanız, çox da dəyişmədiyimizi görərsiniz”, - deyə Frensis vurğulayıb.

Qadının lotereyada uduşdan sonra təsis etdiyi fond vasitəsilə Konolli ailəsi yaşlı insanlara qulluq edən gənclər üçün yaşayış qoşquları alıb, tənhalıqla mübarizə və yaşlı insanlar üçün rəqəmsal layihələri maliyyələşdirib, insanlara ilkin tələbat məhsulları paylayıb və idman klublarını defibrilyatorlarla təmin edib.

“Mən insanlara izah etməyə çalışıram ki, milyonçu olsam da, yoxsulluğun kökünü kəsə bilmərəm və əlbəttə ki, lazım olan hər şeyi təkbaşına edə bilmərəm. Hesab edirəm ki, insanları sadəcə bu işə cəlb etmək lazımdır. Onlara mənim etdiyim kimi davranmaq və insanların həyatını dəyişmək imkanı verilməlidir”, - deyə o, sözlərini yekunlaşdırıb.

Aydın