İntensiv məşqdən sonra əzələlərin bərpası üçün orqanizmə yalnız zülal lazım deyil. Gücün daha tez bərpa olunmasına və iltihab əlamətlərinin azalmasına vişnə şirəsi kömək edə bilər. Xüsusilə bu baxımdan antosianinlər və digər polifenollarla zəngin Montmorensi sortunun turş vişnələri faydalı hesab olunur.

Qaynarinfo xəbər verir ki, bu barədə Kuchnia.wp.pl yazıb.

Bu vişnələr, o cümlədən antosianinlər olmaqla, polifenolların mənbəyidir. Bunlar meyvənin tünd qırmızı rəngindən məsul olan təbii birləşmələrdir. Məhz bu maddələr fiziki yükdən sonra bərpa kontekstində daha çox araşdırılır. Onların ağır məşqdən sonra iltihab göstəricilərinə və əzələ gücünün bərpasına təsir göstərə biləcəyi düşünülür.

Mütəxəssislər bildirirlər ki, bu içki ara-sıra idmanla məşğul olan hər kəsin rasionunda mütləq olmalı deyil. Lakin məşqlər müntəzəm həyat tərzinin bir hissəsidirsə, uzun məsafə qaçılıbsa, intensiv ayaq məşqi keçirilibsə, turnirdə iştirak edilibsə, oyun keçirilibsə və ya ardıcıl bir neçə gün ağır məşq edilibsə, vişnə şirəsinin qəbul edilməsi faydalı ola bilər.

Araşdırmalar nə göstərir?

Araşdırmalarda nəticələr hər dəfə eyni olmayıb, lakin bir neçə məqam daha çox təkrarlanır.

2026-cı ildə “Sports Medicine” jurnalında dərc olunan və fiziki məşqlərlə məşğul olan insanların iştirak etdiyi 19 araşdırmanı əhatə edən meta-analiz göstərib ki, turş vişnə şirəsi fiziki yüklənmədən sonra əzələ gücünün bərpasına kömək edə və bəzi iltihab göstəricilərinin səviyyəsini azalda bilər.

Bununla belə, tədqiqat müəllifləri vurğulayıblar ki, vişnə şirəsinin hər zaman əzələ ağrılarını azaltdığı və ya bərpanın bütün göstəricilərini yaxşılaşdırdığı qəti şəkildə təsdiqlənməyib.

Komanda idman növləri ilə məşğul olan idmançıların iştirak etdiyi araşdırmalardan birində turş vişnə şirəsi içən şəxslərin intensiv fiziki yüklənmədən sonra tullanma, sprint və güc testlərində əvvəlki nəticələrinə daha sürətlə qayıtdıqları müəyyən edilib.

Bununla yanaşı, bəzi araşdırmalarda vişnə şirəsinin plasebodan nəzərəçarpacaq üstünlüyü aşkarlanmayıb. Buna görə də mütəxəssislər bu içkini hər məşqdən sonra möcüzəvi vasitə kimi deyil, əlavə dəstək kimi nəzərdən keçirməyi tövsiyə edirlər.

Vişnə şirəsini nə vaxt içmək lazımdır?

Araşdırmalarda iştirakçılar adətən turş vişnə şirəsi və ya konsentratını intensiv fiziki yüklənmədən bir neçə gün əvvəl və məşqdən sonra daha 2-3 gün ərzində qəbul ediblər.

Mütəxəssislərin fikrincə, bu, orqanizmə əzələlərin ən çox yükləndiyi dövrdə antosianinlər və vişnədəki digər birləşmələri müntəzəm şəkildə qəbul etmək imkanı verir.

Vişnə şirəsinin digər faydaları

Vişnələrin, xüsusilə turş növlərinin az miqdarda melatonin ehtiva etdiyi bildirilir. Bu səbəbdən vişnə şirəsi yuxunun keyfiyyətinin yaxşılaşmasına kömək edə bilər.

Bundan başqa, bu içkinin tərkibində əzələlərin və sinir sisteminin normal fəaliyyəti üçün vacib olan kalium var.

Vişnə şirəsi karbohidratlarla da zəngindir. Bu isə intensiv məşqdən sonra enerji ehtiyatlarının bərpasına kömək edə bilər.

Aydın