Teleaparıcı İlham Mirzəyevin həbsi ətrafında ehtimallar, telejurnalistə qarşı araşdırma yazılarının müəllifi, “Xalq qəzeti”nin yazarı İttifaq Mirzəbəylinin açıqlamaları və aparıcının arxasından AST Şirkətlər Qrupunun prezidenti Telman İsmayılov və Baş nazirin keçmiş müavini Abbas Abbasov kimi isimlərin boylanması bir sıra məsələləri yenidən gündəmə gətirdi.İ.Mirzəbəyli öz Feysbuk statusunda yazır ki, İlham Mirzəyevi yerində saxlayan adamlardan biri ötənilki prezident seçkilərindən əvvəl Moskvadan İstanbula gələrək, Azərbaycandakı siyasi vəziyyətə müdaxilə etmək barədə plan hazırlanmasında iştirak edib. İndi həmin məsələnin detalları araşdırılır. Detal isə çox pis şeydir. İraq olsun...
Bu informasiya qarşılığında prezident seçkilərindən öncə İlham Mirzəyevin Türkiyədə - Antalya və İstanbulda - dincəlməsi və AST Telmandan qiymətli hədiyyələr alması xəbəri gündəmə gəlir.
Həmin ərəfədə mediaya açıqlama verən İlham Mirzəyev Türkiyə istirahətindən danışarkən, Antalyada "Mardan Palace"da dincəldiyini təsdiqləyir:
“Antalyada "Mardan Palace"da 10 gün həm dincəldim, həm də müalicə aldım. Gündüzlər bir neçə saat Antalyada xəstəxanada müalicə alırdım. Günün qalan hissəsini ailəmlə birlikdə dincəlirdim. 10 gün Antalyada qaldıqdan sonra İstanbula gəldim və daha 5 gün Hilton oteldə dincəldik”.
İlham Mirzəyev ANS-ə verdiyi açıqlamada istirahət etdiyi otelin sahibi, azərbaycanlı biznesmen Telman İsmayılovdan böyük diqqət və hörmət gördüyünü də demişdi:
" Nə yaxşı ki, bu dünyada yaxşı insanlar var. Telman bəy mənim orada dincəldiyimdən xəbər tutduqda öz diqqət və qayğısını bizdən əsirgəmədi. Otelində qaldığım müddətdə dünyanın dörd tərəfindən orada dincəlməyə gəlmiş azərbaycanlılarla görüşlərim təşkil edildi"
İlham Mirzəyevlə Telman İsmayılovun arasında yüksək münasibətlərin olduğunu təsdiqləyən digər fakt isə teleaparıcıya qızıl və gümüşlə işlənmiş əl işi olan Müqəddəs Quran kitabı və "Mardan Palace"ın leybolu qızıl əqrəb bağışlanmasıdır. Hündürlüyü 40 sm, eni 20 sm ölçülü qızıl əqrəbin çəkisi təxminən 500 qramdır:
"Telman İsmayılov mənim Allah adamı olduğumu görüb, mənə belə bir gözəl hədiyyəni etdi. Bu Quranın qiyməti yoxdur. Çünki əl işidir və kitabın öz üzəri əl işi ilə qızıl və gümüşlə işlənib, vərəqləri qızıl suyuna salınıb. Qabı bütünlüklə qızıl və gümüşdən ibarətdir. Xüsusi olaraq hazırlanmış bu müqəddəs kitabın qiyməti yoxdur".
Azərbaycanda hakimiyyət dəyişikliyində maraqlı olması ilə bağlı ciddi iradlarla qarşılanan və İlham Mirzəyevin işdə saxlanılmasının əsas səbəbkarı sayılan Telman İsmayılov və Abbas Abbasovun prezident seçkilərindən əvvəl Türkiyədə olmaları və həmin ərəfədə İlham Mirzəyevin “Mardan Palace”də dincəlməsi təsadüfdürmü?
İ.Mirzəbəyli də öz statusunda buna işarə edib…
Qaynar.info
