Əməkdar artist Aygün Bəylərin qardaşı Abbas Hümmətov və digərilənin işi üzrə ibtidai istintaq yekunlaşıb. Bakı şəhər prokuroru Əziz Seyidovun rəhbərliyi ilə aparılan ibtidai istintaq belə qənaətə gəlib ki, qətl şəxsi münasibətlər zəminində törədilib. Yayıminfo.com-un məlumatına görə, iş materialları baxılmaq üçün Bakı Ağır Cinayətlər Məhkəməsinə göndərilib.
Qeyd edək ki, 2016-cı il avqustun 30-da Daxili İşlər Nazirliyinin (DİN) yaydığı məlumata görə, Suraxanı Rayon Polis İdarəsi və rayon prokurorluğunun əməkdaşları tərəfindən həyata keçirilən əməliyyat-axtarış və istintaq tədbirləri nəticəsində 2013-cü ilin iyun ayının 16-dan itkin düşmüş şəxs kimi axtarışda olan Bakı şəhər sakini Elnur Hümbətovun qətlə yetirildiyi müəyyən edilib. Faktla əlaqədar həyata keçirilən istintaq-əməliyyat tədbirləri nəticəsində məlum olub ki, E.Hümbətov 2013-cü ilin may ayında həmyerliləri Fuad Məmmədzadə, Elmir Alxazov, Abbas Hümmətov, Ramil Əsirov və qardaşı Elnur tərəfindən Xəzər rayonunun Qala qəsəbəsi ərazisində boğulma yolu ilə qətlə yetirilib. Cinayəti törətməkdə şübhəli bilinən şəxslər polisin keçirdiyi əməliyyat nəticəsində saxlanılaraq istintaqa təqdim olunublar.
Araşdırmalar zamanı məlum olub ki, qeyd edilən şəxslər cinayətin izini itirmək məqsədi ilə meyiti Qala qəsəbəsində əvvəldən müəyyən etdikləri yerdə basdırıblar. Polis və prokurorluq orqanları əməkdaşları tərəfindən hadisə yerinə birgə baxış keçirilib və E.Hümbətovun meyitinin qalıqları basdırıldığı yerdən ekskumasiya olunaraq Məhkəmə Tibbi Ekspertiza və Pataloji Anatomiya Birliyinə göndərilib. Faktla bağlı Suraxanı rayon prokurorluğunda cinayət işi başlanılıb və iş digər istintaq hərəkətlərinin davam etdirilməsi üçün Bakı Şəhər Prokurorluğuna göndərilmişdi. İstintaqın qətlin motivi ilə bağlı gəldiyi nəticəyə rəğmən belə məlumatlar da var ki, qətl digər bir cinayətin ört-basdır olunması məqsədi ilə törədilib. Hər halda məhkəmədə bu məsələnin də üzə çıxma ehtimalı var.
Qaynar.Az
