Ekologiya və Təbii Sərvətlər Nazirliyinin (ETSN) əməkdaşları tərəfindən meşələrin qorunub mühafizə olunmasına nəzarətin gücləndirilməsi məqsədilə bu gün Zaqatala Dövlət Təbiət Qoruğunun ərazisində növbəti reyd keçirilib.
ETSN-in mətbuat xidmətinin rəhbəri İradə İbrahimovanın verdiyi məlumata görə, reyd zamanı qoruğun ərazisində Baldırğanıq adlanan sahənin 7 yerində naməlum şəxslər tərəfindən qanunsuz olaraq 147 çətənə kolunun əkilib-becərilməsi və onlara aqrotexniki qaydada qulluq göstərməsi faktı aşkar edilib. Həmin sahədə bir ədəd çadır, bir ədəd qaz balonu, yataq ləvazimatı və suvarma üçün boru da tapılıb.
Faktla bağlı ETSN-in əməkdaşları dərhal Daxili İşlər Nazirliyinin aidiyyəti qurumuna məlumat veriblər. Hazırda araşdırma aparılır.
ETSN-nin əməkdaşları tərəfindən reydlər davam etdirilir.
Xatırladaq ki, avqustun 7-də də ETSN əməkdaşları tərəfindən Zaqatala Dövlət Təbiət Qoruğunun ərazisində keçirilən reyd zamanı, Arılıq meşəsinin Sarıçay sahilində naməlum şəxslər tərəfindən qanunsuz olaraq kol-kosdan təmizlənmiş 16 m2 sahədə tərkibində narkotik maddələr olan 1-3,5 metr hündürlüyündə 29 ədəd çətənə bitkisinin əkilib becərilməsi və onlara aqrotexniki qulluq edilməsi faktı aşkar olunub. Faktla bağlı dərhal Daxili İşlər Nazirliyinin aidiyyəti qurumuna məlumat verilib.
Qaynar.info
