Bakıda fəaliyyət göstərən "Global - Xaricdə Təhsil Konsultasiya Mərkəzi" haqqında rdeaksiyamıza şok ittihamlar daxil olub.
Qaynar.info-ya Sərraf Əmənov adlı vətəndaş tərəfindən daxil olan şikayətdə bildirilir ki, sözügedən mərkəz onu aldadaraq pullarını mənimsəyib. Belə ki, o, bu mərkəzin göndərişi əsasında Amerika Birləşmiş Ştatlarına getsə də, küçələrdə qalıb.
S.Əmənov deyir ki, o, bir müddət öncə Tərlan Yusifovun rəhbərlik etdiyi “Global - Xaricdə Təhsil Konsultasiya Mərkəzi”nə ABŞ-da dil kursu keçmək istəyi ilə bağlı müraciət edib.
Şirkətin rəhbəri ilə orta məktəbdə bir oxuduğu üçün ona etibar edib. Bu səbəbdən şirkətlə müqavilə bağlamayıb və şirkət ona bildirib ki, təhsil alması üçün lazımı prosedurları manat məbləği qarşılığında təşkil edəcək: “Ona ABŞ-da 3 aylıq ingilis dili kursunun təşkil edilməsi qarşılığında 2240 ABŞ dolları verdim. Bu pulun 160 dolları viza üçün nəzərdə tutulmuşdu. Vizaya girdikdən sonra o, mənə ABŞ-da 1 aylıq kursun sənədini gətirdi və mən bunun 3 ay olmadığını gördükdə şübhələndim. Bu işlə bağlı ABŞ-dakı universitetə zəng etdim. Onlar mənə dedilər ki, sizə aid burda heç bir qeydiyyat yoxdur. Ancaq mənim vaxtım yox idi. Tərlanla yenidən danışdım və o, məni inandırdı ki, narahat olma, get orda səni qarşılayacaqlar. ABŞ-a gəldikdən sonra kursa getdim, mənə dedilər biz nə o şirkəti tanıyırıq, nə də sənin adın bizdə yoxdur. Mənim verdiyim pulun qarşılığında mənə ev tutulmalı idi. Gəldim gördüm ev də yoxdu və küçələrdə qaldım. Yenidən Tərlana müraciət etdim və mənə bildirdi ki, guya pulu viza üçün ABŞ səfirliyində kiməsə verib. Buradan belə çıxır ki, o, ABŞ səfirliyini də rüşvət almaqda ittiham edir. Halbuki mən bütün sənədləri özüm düzəldib vizaya girmişdim. Məndən başqa belə vəziyyətə düşən başqa adamlar da var. Onlar da Tərlandan şikayətçidir”.
"Oğlum Tərlana 2240 dollar pul verib"
Sərraf Əmənovun atası Zahir Əmənov isə Qaynar.info-ya açıqlamasında bildirdi ki, məsələ ilə bağlı bir sıra qurumlara, o cümlədən Milli Təhlükəsizlik Nazirliyinə müraciət ünvanlayıb: “Oğlum Tərlana 2240 dollar verib. Bu pullar guya aşağıdakı məqsədlər üçün xərclənəcək: Qeydiyyat pulu - 95$, Təhsil vəsaitləri - 75$, Ev tapmaq xərci - 150$, 3 həftəlik, yarı intensiv günlük 3 saat kurs pulu - 440$. Bundan əlavə 3 həftəlik evdə yerləşdirmə - 1050 $, 1050 $ (ev) + 760 $ (digər xərclər) və 160 $ viza haqqı.
270 dollar da, heç nə etmədiyi, əksinə saxtakarlıq etdiyinə görə özü üçün zəhmət haqqı.
Tərlan Yusifov həmin puldan cəmi 160 dollar viza üçün köçürüb və Sərrafa saxta sənədlər verib
ABŞ-ın Nyu-York ştatına çatandan və həmin dil kursunun yerləşdiyi ünvana gedəndən sonra oğluma məlum olub ki, buradakı kursa onunla bağlı heç bir məlumat verilməyib. Nə təhsil haqqı ödənib, nə ev kirayəsi, nə digər xərclər. Bu barədə Sərraf oradakı dil kursundan rəsmi məktub alıb. O da məlum olub ki, Tərlan Yusifov ABŞ-dakı bu məktəbin blankını saxtalaşdırıb. Həmin məktəbin rəhbərinin adından yalandan qol çəkib.
Oğlum Sərraf bu barədə Tərlanın özünü də məlumatlandırıb. Tərlan isə saxtakarlığının faş olduğunu görüb Sərrafı hədələməyə başlayıb ki, elə etmə, səni oradan tez-bazar qaytarım. Sonra isə telefonlara, çağırışlara cavab verməyib. Həm də bildirib ki, guya həmin pulları ABŞ səfirliyində kiməsə verib, onunla işi həll edib. Halbuki oğlum viza almaq üçün ABŞ səfirliyindən tam qanuni formada keçib. Xatırladım ki, o, 5 il öncə də ABŞ-da dörd ay olmuş, heç bir problem çıxmadan nəzərdə tutulan vaxtda geri qayıtmışdı.
Beləliklə, Tərlan saxtakarlıq yolu ilə oğlumun 2080 dollarını (160 dollar viza haqqı çıxıldıqdan sonra) mənimsəyib və oğlum üçün ABŞ-da ev kirayələmək, təhsil almaq sahəsində problem yaradıb.
Bu barədə Milli Təhlükəsizlik Nazirliyinə məktub unvanlamışam və xahiş etmişəm ki, Tərlan Yusifovun oğlumu aldadaraq ondan aldığı pulun (viza haqqı çıxıldıqdan sonra 2080 dollar, 1630 AZN) qaytarılmasında və saxtakarın cəzalandırılmasında bizə yardımçı olsunlar.
"Bu mənim işimin puludur"
Məsələ ilə bağlı Tərlan Yusifovun özü ilə əlaqə saxladıq. T. Yusifov Qaynar.info-ya açıqlamasında bildirdi ki, Sərrafın və atasının dediyində müəyyən həqiqətlər olsa da, ümumilikdə ona şər atırlar: “Mən Sərrafı çoxdan tanıyıram. Sərraf bir müddət öncə gəlib mənə dedi ki, onun Bakıda yaxşı işi var, işləyir, yaxşı maaş alır. Bu yaxınlarda 1 aylıq ABŞ-a istirahətə getmək istəyir. Gedib bir az dincələcək və məndən xahiş etdi ki, viza almaq məsələsində ona kömək edim. Mən də ona izah etdim ki, turist vizası almaq üçün məüyyən sənədlər lazımdır. Sənədləri ona sadaladım. Sonra dedim ki, gəl səni ingilis dili kursuna göndərək, get 1 ay həm ingilis dilini təkmilləşdir, həm də istirahət et. Sərrafın mənə verdiyi cavab bu oldu ki, yox, mən ingilis dili kursuna getmək istəmirəm. Boston və Nyiu-Yorkda dostlarım var, gedib onların yanında istirahət edəcəm, sonra da işləyəcəm.
Belə olan halda mən də təklif etdim ki, bizim Nyu-Yorkda əməkdaşlıq etdiyimiz dil kursu var. Səni ora qeydiyyat edə bilərəm, ordan sənin üçün dəvət məktubu gətizdirə bilərəm, sən də o məktub əsasında gedib səfirliyə müraciət edərsən, vizanı alarsan. Bütün bunları Sərrafla 1760 manat məbləğində danışdıq, amma o, mənə 1560 manat pul verdi, 200 manat mənə borclu qaldı. Bu pula məktəbə qeydiyyat, məktəbə ödəniləcək vəsait və orda qalacaq yerin təşkili pulu və viza rüsumu hesablanıb. Biz Sərrafın getməsi üçün 600 manat pul xərcləmişik”.
T. Yusifov bildirdi ki, Sərraf vizaya girməzdən əvvəl ortaq dostlardan biri ona Sərrafla bağlı bəzi iradlar bildirib: Deyib ki, Sərraf gedib qayıtmayacaq və sənin adın pis çıxacaq: “Mən Sərrafla yenidən danışdım və dedim əgər belə bir məsələ varsa, əvvəlcədən məni agah et, bilim. Sərraf bunu təkzib etdi və mənə dedi, sən sadəcə məni buradan çıxart, mən ABŞ-a gedim və elə olsun ki, kursa getməyim. Mən də kursla yazışmalar apardım və qaydaya əsasən kursun qeydiyyat pulunu köçürdüm. Adətən, bizdə belə olur ki, əgər tələbə sonradan kursdan imtina edirsə, kurs ödənilən pulu saxlayır əlində və tələbəni dərsdən azad edir. Bu dediyim kimi təqribən 600 manat pul edir. Bizim Sərrafdan təqribən 1000 ABŞ dollarına yaxın qazancımız olub. Bu da mənim işimin puludur. Sərrafın bizə birinci yalanı orda olub ki, 1 aylıq getdiyini deyib, amma indi qayıtmır. Bu yolla gedən tələbələr də B1 vizası ilə gedirlər. Bu da o deməkdir ki, həm turist kimi, həm də həftədə 15 saat dərs yükü götürmək olar. Sərraf bu vizanın turist tərəfini istifadə edib. Hansı ki, buradan gedəndə də mənə demişdi ki, mən Nyu-Yorka getsəm də, ordan Bostona dostlarımın yanına gedərəm. Bütün bunlardan sonra Sərraf işi öyrəndi və bildi ki, bu işdə mənim də qazancım olub. Belə olanda o, mənə qarşı çıxmağa başladı. Hansı ki, bu pul mənim zəhmət haqqımdır”.
ABŞ-ın Azərbaycandakı səfirliyi ilə bağlı səslənən ittihama gəlincə isə T. Yüsifov bildirdi ki, bu mümkünsüzdr: “Kimsə belə bir şey edə bilməz. Səfirliyə sənədlər təqdim olunur və o sənədlər əsasında verilir. Yenə də deyirəm ki, bu yolla gedən tələbələr də B1 vizası ilə gedirlər. Bu da o deməkdir ki, həm turist kimi, həm də həftədə 15 saat dərs yükü götürmək olar. Sərraf bu vizanın turist tərəfini istifadə edib”.
Pərviz Əzimov
Qaynar.info
Sərraf Əmənova Tərlan Yüsifov tərəfindən təqdim olunan sənəd
