Aprelin 19-da saat 09.50 radələrində Ermənistan ordusu daha bir itki verib.
Musavat.com Ermənistan KİV-inə istinadən xəbər verir ki, cəbhənin cənub istiqamətində 1996-cı il təbəllüdlü hərbi qulluqçu Gevorgyan Gevorg Qareqinoviç öldürülüb. Erməni tərəf həbçinin Azərbaycan tərəfdən açılan atəş nəticəsində məhv edildiyini iddia edir. Hələlik Azərbaycan tərəfi məsələyə münasibət bildirməyib.
Yeri gəlmişkən, aprelin 18-də qanunsuz olaraq Azərbaycanın işğal altındakı ərazilərinə səfər edən və hərbçilərlə görüşüb panik vəziyyətdə olan işğalçılara ürək-dirək verməyə çalışan Ermənistan prezidenti Serj Sərkisyan bu gün aprelin ilk günlərində “qəhrəmanlıq göstərmiş” Ermənistan və “Qarabağ ordusu”nun hərbçilərinin mükafatlandırılması barədə sərəncam imzalayıb. Diqqətçəkən budur ki, Sərkisyan tez-tələsik bu addımı Azərbaycan prezidentinin ordumuzun əsgər və zabitlərinə yüksək adlar verilməsi ilə bağlı sərəncam imzalayandan dərhal sonra atıb.
Qaynarinfo.az
