Ərturqut Əliyev: "Sonrakı günlərdə Hacıbala müəllimlə əlaqə saxlaya bilmirəm, nömrələrini də tapmıram ki, özünə zəng edim”
Milli Azadlıq hərəkatının lideri, eks-prezident Əbülfəz Elçibəyin qardaşı Almurad Əliyev modern.az saytına açıqlamasında deyib ki, qardaşı oğlu Ərturqut Əliyevə dəfələrlə iş təklifi gəlsə də, o, bundan imtina edib. "Mən özüm də ona bir neçə dəfə demişəm ki, dövlət orqanlarında işə düzəldə bilərəm. Hətta Ərturquta Prezident Administrasiyasında işləmək üçün imkanlar da yaranıb” - deyə A.Əliyev bildirib.
Bakı Kooperasiya Universitetini bitirən, Daxili Qoşunlarda hərbi xidmətini başa vuran Ə.Əliyev sonrakı müddətdə MHP lideri Dövlət Baxçalının dəstəyi ilə Türkiyədə təhsilini davam etdirsə də, hazırda işsizdir. Son gəlişmələr, dəvətlə bağlı deyilənlər və digər mövzularla bağlı Ərturqut Əliyevlə danışdıq. O, Prezident Administrasiyadan dəvət alması xəbərini təəccüblə qarşıladı:
- Açığı, belə bir şey olmayıb. Bu məlumat hardan ortaya çıxıb, bu, hələ mənə çatmır.
- Əminiz Almurad bəyin açıqlamasını yəqin oxumusunuz…
- Hə, oxudum. Amma elə bu mənə çatmadı ki, indiyə qədər mənə heç bir idarədən təklif gəlməyib ki, gəl, filan yerdə işlə. Belə söhbət olmayıb. Danışmağa qalsa, əmim də gedib deyəcək ki, filankəsin qohumuyam, Elçibəyin qardaşıyam, uşağa iş verin. Bunu özüm də eləyə bilərəm. Ancaq demişəm ki, belə iş mənə lazım deyil.
- Ancaq vaxtaşırı dövlət qulluğuna qəbulla bağlı elanlar verilir. Niyə həmin imtahan-müsabiqələrdə iştirak etmək istəmədiniz?
- Bilirsiniz necədir? Gedib işə girmək olar. Sadəcə qorxduğum bir şey var ki, mənə görə kimisə işdən çıxarmasınlar.
- Niyə işdən çıxartmalıdırlar axı? Söhbət vakant yerlərdən gedir.- Bir neçə il bundan əvvəl belə şey olmuşdu. Bir tanışdan soruşdum ki, bir iş var, nə məsləhət görürsən. Dedi, sən o işə getsən, idarənin rəisi işdən çıxacaq, ona görə də məsləhət deyil. Çünki idarə rəsilərinin çoxu Elçibəyin oğlunu işə götürməyə qorxur.
- Əgər siz dövlət qulluğunda imtahan verib işə qəbul olsanız, o halda kimsə sizin işləməyinizə qarşı çıxa bilməz. Bəlkə bir sınayasınız özünüzü. - Sınayacağam. Görək bundan sonra nə olacaq.
- Hansı sahədə işləmək daha çox ürəyinizdən keçir?- Mənim ixtisasım beynəlxalq iqtisadi münasibətlərdir. Elə bu sahədə çalışmaq istərdim.
- Konkret ürəyinizdə keçən nazirlik varmı?- Yox, iş olsun. Mənimçün fərqi yoxdur.
- Bir ara Türkiyədə çalışmaq niyyətiniz var idi. Bəlkə burda işləmək istəməməyiniz həm də Türkiyəyə getmək niyyətindən irəli gəlir...
- Açığı, mən Türkiyədə qalmaq istəmədim, ona görə də buradayam. Əks təqdirdə Türkiyəyə gedə bilərdim.
- Son günlər Əbülfəz bəyin arxiv materiallarının dağınıq vəziyyətdə olması, məhv olma təhlükəsi ilə bağlı danışılır. Bəyin varisi olaraq qol çirməyib həmin materialları bir yerə toplamaq, qorunması üçün hərəkətə keçmək niyyətiniz varmı?- Əslində bir neçə ay bundan əvvəl bunun üçün Bakı Şəhər İcra Hakimiyyətinə ərizə də yazmışdıq. Həmin materialları toplamaq üçün yer istəmişdik. Lakin ötən aylarda ərizədən xəbər çıxmadı, gözləyirik.
- Aldığım məlumata görə, siz Hacıbala Abutalıbovun da qəbulunda olmusunuz. Mer nə dedi, nə danışdı, sizi necə qarşıladı?- Dedi, məsələ ilə bağlı sizə xəbər edəcəyik. Amma üstündən keçən aylarda bir soraq çıxmadı.
- Abutalıbova işlə bağlı müraciət etmişdiniz, yoxsa ev muzeyi ilə bağlı?- Muzeylə bağlı. Daha doğrusu, biz dedik ki, materiallar xarab olmasın, məhv olmasın deyə, bir yer verin ki, onları bir yerə yığaq, saxlayaq. O isə dedi ki, ev muzeyinin yaradılması onun səlahiyyətində olan məsələ deyil. Dedik, onda ailəyə ev verilsin, biz o əşyaları toplayıb saxlayaq. O da dedi ki, bu, sizin haqqınızdır, niyə də müraciət etməyəsiniz. Ancaq qeyd etdi ki, daha yaxşı olar ki, ailəyə mənzil verilməsi ilə bağlı prezidentə müraciət edəsiniz. Hacıbala müəllim bildirdi ki, bu, sizin haqqınızı almağınız üçün sadə bir prosedurdur. Biz də dedik ki, heç problem yoxdur, müracuiət edərik. Müraciət etdik, lakin hələ həmin müraciətə cavab verilməyib. Sonrakı günlərdə Hacıbala müəllimlə əlaqə saxlaya bilmirəm, nömrələrini də tapmıram ki, özünə zəng edim.
- Abutalıbov sizi necə qarşıladı, nə danışdı?- Çox yaxşı danışdı. Siyasətdən, atamın hakimiyyətə gəlməsindən, getməsindən danışdı. Hər halda müsbət fikirlərini bölüşdü.
- Əbülfəz bəyə məxsus hansı materiallar var sizdə?- Özünün əlyazmaları, videokassetləri, çıxışları, görüşləri, şəkilləri, Ankarada xəstə olduğu müddətdə yığılıb qalan əşyaları, BAB-dan qalan materialları var. Bizim evdə bəzi yerdə nəmlik var, həmin materiallar da nəm çəkir. Hələ bunlar bizim evdə olanlardır. Xeyli materiallar dağınıq haldadır ki, kimdə olduğunu bilmirik. İstəyirdik ki, quru bir yer verilsin, o materiallar nəm çəkməsin, amma bir şey çıxmadı.
- Məsələ ilə bağlı ölkə prezidentinə müraciət etmək fikriniz varmı? Ən azı ona görə ki, "Eks-prezidentlərin statusu haqqında” Qanun qəbul olunub və məntiqlə digər zəruri addımlar da atılmalıdır...- Belə getsə, prezidentə müraciət etməli olacağıq.
- Hazırda hansısa şəxsi məşğuliyyətiniz varmı?- Yox, heç bir işim yoxdur.
- Nə gənclər təşkilatında, nə siyasi partiyalarda yoxsunuz. Bəs, hardasınız?- Ancaq özümün dost çevrəm var. Siyasətdən kənar olan dostlardır.
- Mətbuata ünvanlı nəsə sözünüz varmı?- Bir xahişm var. Xahiş edirəm ki, bundan sonra heç bir jurnalist başqa kiməsə kitab edib heç nə yazmasın. Kim nəsə soruşmaq istəyirsə, məndən soruşsun.
Qaynar.info
