Ekologiya və Təbii Sərvətlər Nazirliyinin (ETSN) Ətraf Mühit üzrə Milli Monitorinq Departamenti Bakıda və Abşeron yarımadasında müşahidə olunan toz-dumanı ilə bağlı operativ iş rejiminə keçərək, hər üç saatdan bir atmosfer havasında müşahidələr aparır.
ETSN-dən Qaynarinfo-ya bildirilib ki, havanın keyfiyyətini ölçən avtomatik və stasionar monitorinq stansiyalarından alınan məlumata görə 29 mart 2018-ci il tarixində Bakı və Abşeron yarımadasında tozun miqdarının saat 18:00-da bir qədər də artaraq sanitar normadan 40 faiz yuxarı olduğu qeydə alınıb.
Qeyd edək ki, bu ETSN-dən gün ərzində verilən 4-cü açıqlamadı. Nazirlik saat 09.00-da Bakı və Abşeron yarımadasında tozun miqdarının sanitar normadan 20, saat 12.00-da 25, saat 15.00-da 32 faiz yuxarı olduğunu açıqlamışdı.
