Ermənistan ordusunun uzaq mənzilli raket hücumu nəticəsində
evi dağılan azərbaycanlı Mais Məmmədov əlləriylə qazaraq ailəsini dağıntılar
altından qurtarıb.
Qaynarinfo xəbər verir ki, bu haqda TRT Haber-in Azərbaycandan
hazırladığı reportajda deyilir.
Azərbaycan ordusunun ərazilərini qurtarmaq üçün
başlatdığı əməliyyatda mövqelərini bir-bir itirdikdən sonra geri çəkilən Ermənistan
ordusu cəbhə xəttindən uzaq ərazilərdə mülki yaşayış məntəqələrini hədəf almağa
davam edir. Erməni ordusu dünən axşamdan bu səhərədək Beyləqana da çox sayda
uzun mənzilli raket atıb.
Raketlərin düşdüyü yerdə böyük quyular əmələ gəlib,
ətrafdakı bütün tikililər zədələnib.
Hücum nəticəsində Beyləqan şəhər mərkəzində yaşayan
Mais Məmmədovun evi də tamamilə dağılıb və ikisi uşaq olmaqla ümumilikdə 5 nəfər
dağıntılar altında qalıb. Hadisələrdən bəhs edən Məmmədov ailəsinin bir möcüzə
ilə xilas olduğunu deyib. Qonşusu ilə küçədə gözləyərkən təyyarə səsinə bənzər
bir səs eşitdiklərini və daha sonra şiddətli bir partlayış olduğunu qeyd edən Məmmədov
dərhal evlərinə qaçdıqlarını və acı bir mənzərə ilə qarşılaşdıqlarını deyib.
Dağılan evin qalıqlarını axtarmağa başladıqlarını
söyləyən Məmmədov hadisəni belə təsvir edib:
"Bir uşaq əli ayağımı tutdu. Çöldə yalnız bir əl
görünürdü. Qızım olduğunu başa düşdüm. Dərhal əllərimizlə qazmağa başladıq.
Onları növbə ilə dağıntı altından çıxardıq. Arvadım, qızım və 3 qonağımızı
xilas etdik. Bununla bizi qorxuda bilməzlər. Vətən sağ olsun! Ermənistan etdiyi
namərdlikdir. Belə yüz ev şəhidlərimiz, əsgərlərimizə qurban olsun”.
