"Hakim səhvləri çoxdur" - Qurban Qurbanov

Fanat.Az xəbər verir ki, o, 1:2 hesablı məğlubiyyəti belə şərh edib:

"Uduzmaq istəməzdik, amma məğlub olduq. Futbolçularım demək olar ki, 90 dəqiqə oyuna nəzarət edə bildilər. Futbolun belə çirkin tərəfləri var ki, son dəqiqələrdə hər şey dəyişir. "Turan Tovuz”u təbrik edirəm.

Sanki hakimlər bəzi məqamlara bəsit yanaşırlar. Axı siz 15 yaşlı uşaqlara hakimlik etmirsiniz. Camaatın haqqı yeyilir. Ancaq bütün bunlar təbii ki, uduzmağımızın əsas səbəbi deyil. Sadəcə, biz belə məqamlara çox rast gəlirik. Bu anlarda da emosiyamızı saxlaya bilmirik. Məsuliyyətsizlikdir. Burada komandanın bir fərqi yoxdur. Hakim səhvləri çoxdur. Futbolda məsuliyyət çox olmalıdır. Hər kəs belə yanaşmalıdır. Hakimlər xüsusilə, belə yanaşmalıdır. Lakin hər bir halda, qalib gələni təbrik etmək lazımdır. Mən sadəcə, futbolçularımın əziyyətinə görə təəssüflənirəm. Ard-arda məğlubiyyət təsir edir.

Psixoloji baxımdan futbolçularım çox yaxşı idilər, yaxşı hazırlaşmışdılar. Amma daha çox hazırlıqlı olmalı idik. Düşünürəm ki, bizi də başa düşərlər, üstümüzdə yük çoxdur”.

Baş məşqçi eyni zamanda, Avropa Liqasında "Olimpiakos”la oyundan gözləntilərini bölüşüb:

"Yaxşı hazırlaşmalıyıq. Çox ciddi rəqibdir. Ən sürətli və aqressiv komandalardan biridir. Məncə, daha rahat oynayacağıq, stres az olacaq. Bu günə kimi yaxşı oyunlarımız oldu, ancaq yaxşı nəticələrimiz olmadı”.