Alman idman geyimləri nəhəngi “Adidas” Zinəddin Zidanla əməkdaşlığının 30-cu ildönümünü fransız futbolçunun şərəfinə hazırlanmış yeni buts modeli ilə qeyd edib.

Qaynarinfo xəbər verir ki, bir məhsulla idmançı arasında güclü assosiasiyanın yaranması idman marketinqində uğurun əsas göstəricilərindən hesab olunur. “Adidas” isə fransız futbol əfsanəsi Zinəddin Zidanla uzunmüddətli əməkdaşlığı sayəsində buna nail olub.

“Adidas” bu il keçmiş “Real Madrid” futbolçusu ilə 30 illik tərəfdaşlığını qeyd edir. Zidan 2006-cı ildə futbolçu karyerasını başa vurduqdan sonra da brendlə əməkdaşlığını davam etdirib.

“Adidas Predator”un ilk ulduz futbolçularından biri olan Zidan üçün xüsusi hazırlanmış yeni buts təqdim edilib. Əfsanəvi futbolçu “Yuventus”, “Real Madrid” və Fransa millisindəki karyerası boyunca “Predator” modellərindən istifadə edib və dil hissəsi ilə “Üç zolaq” dizaynı ilə seçilən bu butslarla çoxsaylı yaddaqalan anlara imza atıb.

Üç onilliyi əhatə edən əməkdaşlıq futbol tarixində və ümumilikdə idman dünyasında ən uğurlu kommersiya tərəfdaşlıqlarından birinə çevrilib. Zidan bu gün də “Adidas”ın simalarından biri olaraq qalır.

Unudulmaz anlar

Zidan futbolçu olduğu dövrdə “Adidas Predator”larla çoxsaylı yaddaqalan anlar yaşayıb.

Futbol tarixinin ən texnikalı oyunçularından biri hesab olunan Zidanın kuboklarla zəngin karyerası yadda qalan epizodlarla zəngindir. Onun qədər təsirli kadr arxivinə malik futbolçuların sayı azdır.

Zidanın nüfuzunun sürətlə artdığı və “Qızıl top” qazandığı dövrdə “Predator” da bazarda ən populyar buts modellərindən birinə çevrilib.

Zidan 2002-ci il dünya çempionatında Braziliyaya qarşı iki baş zərbəsi ilə qol vurarkən, həmin il Çempionlar Liqasının Qlazqoda keçirilən finalında “Bayer Leverkuzen”ə qarşı sol ayağı ilə möhtəşəm vole ilə fərqlənərkən və 2006-cı il dünya çempionatının Almaniyada keçirilən finalında karyerasının son oyununda “Panenka” zərbəsi ilə topu tora göndərərkən ayağında “Predator”lar olub.

Bu anlar onun “Üç zolaq”la əlaqəsini daha da möhkəmləndirib. Zidan “Predator”larla qlobal futbol ulduzlarından birinə çevrilib.

Üç onillik davam edən əməkdaşlıq

“Adidas”ın Zidanla əlaqəsi 2006-cı ildə başa çatan futbolçu karyerasından sonra da davam edib.

Futbolda buts müqavilələri dəyişsə də, Zidanın “Adidas”la əməkdaşlığı qorunub və inkişaf etdirilib.

Keçmiş “Real Madrid” futbolçusu Devid Bekhemlə birlikdə Zidan hələ də futbol mədəniyyətinin mühüm simalarından biri kimi brend səfiri vəzifəsini yerinə yetirir. O, “Adidas”ın reklam kampaniyalarında iştirak edir və brendin hazırkı ulduzları, o cümlədən Lamin Yamal və Cud Bellinqemlə birlikdə yeni məhsulların təqdimatında yer alır.

Sahədən kənarda isə Zidan “Adidas”la məşhur yapon moda dizayneri Yohci Yamamotonun əməkdaşlığından yaranan və tarixi 2002-ci ilə gedib çıxan “Y-3” lüks idman geyimi seriyasının simalarından birinə çevrilib.

Zidan 2017-ci ildə “SoccerBible”a verdiyi müsahibədə “Adidas”la əlaqəsinin əhəmiyyətindən danışıb:

“Mənim ən çox qiymətləndirdiyim şey sədaqətdir. “Adidas” hər zaman mənim yanımda olub. Əlbəttə, yaxşı vaxtlarda, amma işlərin bir qədər mürəkkəbləşdiyi dövrlərdə də. Hekayəmiz 1996-cı ildə başladı və “Adidas” bu gün də mənim yanımdadır.

“Aramızda çox xüsusi bağ var. Möhtəşəm münasibətdir. Bu, aramızdakı müqavilədən daha artığıdır. Bundan daha çox şeydir. “Adidas”la mənim aramdakı hekayə 20 illik tarixə malikdir. Bu, möhtəşəmdir.”

“Adidas”ın xüsusi ehtiramı

“Adidas” Fransa və “Real Madrid” əfsanəsi ilə 30 illik əməkdaşlığını qeyd etmək üçün xüsusi “Predator” modeli təqdim edib.

Fransız futbolçunun istedadına ehtiram ifadəsi olaraq hazırlanan model Zidanın oyun üslubuna uyğun detallarla tamamlanıb.

Zidanın zərifliyinə və texniki oyun üslubuna uyğun olaraq butslar metalik qızılı detallarla tamamlanan ağ rəngdə hazırlanıb. Yan hissələrdəki mavi, ağ və qırmızı elementlər onun Fransa millisində qazandığı uğurlara istinad edir. Butslarda xüsusi “ZZ30” nişanı da yer alır.

Dizaynda “Adidas”ın “son dərəcə şəxsi” adlandırdığı və Zidanın futbolçu karyerasına istinad edən detallar da yer alır. Məşhur qatlanan dil hissəsində 2002-ci ildə vurduğu vole zərbəsindən ilhamlanan qızılı Zidan imzası yerləşdirilib.

Qayışlar da dizaynın bir hissəsidir. Hər bir buts Zidanın həyatının fərqli mərhələsini təmsil edir. Sağ ayaqdakı butsda onun karyerasını formalaşdıran Kann, Bordo, Turin və Madrid şəhərlərinin adları yer alır. Sol ayaqdakı butsda isə onun köklərinə, doğma şəhəri Marselə, eləcə də ətrafdakı icmalara və həvəskar klublara istinadlar var.

“Oynamaq istədiyim üslubla eyniləşib”

Zidanın “Adidas”la əməkdaşlığının 30 illik yubileydən sonra da davam edəcəyi gözlənilir.

Yeni məhsulun təqdimatı ilə bağlı danışan Zidan “Adidas”la əlaqəsinin və onunla eyniləşən “Predator” butslarının onun üçün böyük məna daşıdığını bildirib.

“Futbol mənə çoxlu unudulmaz anlar bəxş edib və “Adidas” da bu səyahətin lap əvvəlindən onun bir hissəsi olub”, – deyə o bildirib. – “Predator”un bu hekayədə xüsusi yeri var. Karyeramın ən mühüm anlarından bəzilərində geyindiyim buts məhz bu idi və o, mənim oyunu oynamaq istədiyim üslubla eyniləşən modelə çevrildi.

“Bu butsa baxanda səyahətimi formalaşdıran anları, məkanları və insanları görürəm. Birlikdə keçirdiyimiz 30 ili qeyd etmək və bu hekayəni yeni futbolçu nəsli ilə bölüşmək üçün xüsusi bir yoldur.”

Futbol tarixində ən uğurlu brend əməkdaşlıqlarından biri hesab olunan bu tərəfdaşlığın gələcəkdə də davam etməsi gözlənilir.

Aydın