Səbail rayon sakini Ramin Həsənov icra hakimiyyətini qanunsuzluqda ittiham edir. Qaynar.info-ya məlumat verən rayon sakini bildirir ki, Səbail Rayon İcra Hakimiyyəti yeni qəbul olunmuş Şəhərsalma və Tikinti Məcəlləsinə əhəmiyyət vermir, bir sözlə, vətəndaşın hüquqlarını pozur:
"Səbail rayonu Bibiheybət qəsəbəsində yerləşən və 30 ildən çox bir vaxt ərzində qanuni istifadəmdə olan həyatyanı torpaq sahəmdə hündürlüyu 5 metr, sahəsi 80 kvadratmetr olan birmərtəbəli yardımçı tikili tikməyimə icazə verilmir. Halbuki yeni qəbul olunmuş Şəhərsalma və Tikinti məcəlləsinin 79 maddəsində tikintisinə icazə tələb olunmayan tikinti obyektlərinin siyahisinda məhz bu cür tikililərdə göstərilib. Yəni bu tikintini aparmaq ücün heç icra hakimiyyətinin məlumatlandırılmasına ehtiyac yoxdur".
Vətəndaş bildirir ki, icra hakimiyyətində çalışan məmurlar onun tikiti aparmasına mane olurlar: "İcra hakimiyyətinin Sahib və Anar adlı əməkdaşları tikintinin aparilmasına qanunsuz mudaxilələr edirlər. Mən onları başa sala bilmirəm ki, tikinti prezidentin fərmani ilə Milli Məclis tərəfindən qəbul olunmuş məcəllə əsasında aparılır. Təbii ki, neçə illərdir tikinti işlərinin aparılmasına ancaq rüşvət müqabilində icazə verən Səbail Rayon İcra Hakimiyyətinin əməkdaşları belə bir pul mənbəyinin qapadılması ilə heç cür razılaşa bilmirlər. Artıq 10 ilə yaxındır ki, mənə məxsus olan mülkdə hətta xırda bir tikinti işi də apara bilmirəm. İcra hakimiyyətinin işçilərinin istədikləri məbləğə isə yaxın durmaq olmur. Ətrafımızda onlarla mülkiyyətçi icra hakimiyyəti tərəfindən həyata keçirilən bu cür qanunsuzluqlardan əziyyət çəkir. Milli Məclisdə bu məcəllənin qəbul olunmasina səs verən hər bir deputatdan bizə kömək olmalarını, həmçinin səlahiyyətli orqanlardan bütün bu özbaşınalıq və qanunsuzluqları görməməzliyə vurmamalarını xahiş edirik"
İqtisadçı ekspert Vüqar Bayramlı Qaynar.info-ya verdiyi açıqlamasında hesab edir ki, əgər vətəndaş hündürlüyu 5 metr, sahəsi 80 kvadratmetr olan birmərtəbəli yardımçı tikili tikirsə, qanuna görə icra hakimiyyətinin buna müdaxilə etməsi yolverilməzdir: " Vətəndaşın mülkiyyətində olan torpaq sahəsinin idarə olunmasında aşağıdakı hallarda icazə tələb olunmur; hündürlüyü ən çox 5 metr, sahəsi 100 kvadratmetr olan birmərtəbəli yardımçı tikililərin, kənd təsərrüfatı, meşə təsərüffatı ilə bağlı obyektlərin inşası zamanı. Əgər torpaq vətəndaşın mülkiyyətindədirsə, mülkiyyətində olan torpağla bağlı inşa etmək istədiyi tikilinin hündürlüyü 5 metrdən, o cümlədən sahəsi 100 kvadratmetrdən çox deyilsə, yerli icra hakimiyyəti orqanlarından icazənin alınmasına ehtiyac yoxdur. Bundan çox olarsa, icra orqanlarını məlumatlandırmaq lazımdır. Sözügedən ölçülər daxilində tikinti, nəzərə alsaq ki, bir mərtəbədən və yardımçı tikilidən söhbət gedir, buna görə də həmin tikinti sahəsi yardımçı xarakter daşımalıdır, tikinti sahəsi olmamalıdır, inşa edilmiş evin yardımçı hissəsi olmalıdır. Belə olan halda da, icra orqanlarından icazənin alınması tələb olunmur və icra hakimiyyəti nümayəndələrinin də buna müdaxilə etmək hüququ yoxdur. Bir sözlə, bu, məcəllənin pozulması deməkdir".
Qeyd edək ki, mövzu ilə bağlı Səbail rayon İcra Hakimiyyətinin İctimaiyyətlə əlaqələr şöbəsinin müdiri İsrafil Kərimovla əlaqə saxlamaq istəsək də, təəssüf ki, zənglərimiz cavabsız qaldı.
Qaynar.info 
