Müsavat Partiyasının başqanı İsa Qəmbərlə "El" hərəkatının sədri Eldar Namazov arasında görüş olub. Bu barədə redaksiyamıza daxil olan məlumatda deyilir ki, yanvarın 4-də baş tutan görüşdə başqa heç kim iştirak etməyib. İsa Qəmbərlə Eldar Namazovun görüşünün dekabr ayında Müsavatla EL rəhbərliyi arasında keçirilən görüşün davamı olduğu söylənilir. Böyük ehtimalla hər iki siyasətçi rəhbərlik etdikləri qurumların arasında ikitərəfli əməkdaşlıq və Milli Şuranın fəaliyyəti barədə müzakirələr aparıblar.
Məsələ ilə bağlı ətraflı məlumat əldə etmək üçün Eldar Namazovla danışdıq. Eldar Namazov “Biz vaxtaşırı görüşüb müzakirələr aparırıq, bu da ənənəvi görüşlərdən biri idi”-deyib ətraflı informasiya verməkdən imtina etdi: “Biz vaxtaşırı dostlarımızla oturub nahar edib fikir mübadilə aparırıq. Bu cür görüşlər bizim üçün o qədər adi bir şeydir ki, onunla bağlı mediaya xüsusi informasiya verməyə ehtiyac görmürük”.
Qaynar.info
