Kəlbəcərdə ermənilər tərəfindən girov götürülən Şahbaz Quliyevin göndərdiyi məktub Qırmızı Xaç Komitəsinin nümayəndələri tərəfindən ailəsinə verilib. Bu barədə anspress-ə girovun bacısı İradə Quliyeva məlumat verib.
Onun sözlərinə görə, Şahbaz məktubda vəziyyətinin yaxşı olduğunu yazıb: "Məktubda yazıb ki, hər şey yaxşıdır. Məndən narahat olmayın. Heç nə göndərməyin. Anam üçün çox darıxmışam”.
İradə Quliyevanın sözlərinə görə, Qırmızı Xaç Komitəsinin nümayəndələri ona qardaşının şəklini göstəriblər: “Məhkəmədə necə idisə, indi də elə o vəziyyətdədir. Nə arıqlayıb, nə də kökəlib. Mən də Şahbaza öz şəkillərimizi göndərmişəm. 3-4 cümləlik bir məktubdur. Qızı ilə də məktublaşır”.
Beynəlxalq Qızıl Xaç Komitəsinin (BQXK) əməkdaşları Kəlbəcərdə ermənilər tərəfindən girov götürülən azərbaycanlılara fevralın 3-də baş çəkiblər. Komitə nümayəndələri Şahbaz Quliyev ilə bərabər Dilqəm Əsgərova da məktub gətirmişdilər.
Qaynar.info
