"Bir qrup insan pandemiya qayıdar deyə, təşviş-həyəcan
içində yaşayacaq".
Bunu Qaynarinfo-ya açıqlamasında psixoloq Elnur Rüstəmov
karantin dövründən sonra insanların davranışından danışarkən deyib. Onun sözlərinə
görə, karantin dövrü bitəndən sonra insanlarda müxtəlif istiqamətlərdə
psixoloji narahatlıqlar yaranacaq:
"Bir qism insanların işə, bir qism
şagird və tələbələrin təhsilə adaptasiya olunmasında problem yaranacaq. Bir qism
insanlarda isə təkrar pandemiya qayıda bilər deyə, təşviş-həyəcan artacaq.
Xırda bir qızdırma olanda düşünəcəklər ki, elə koronavurusdur. Bu, özünü fərdi
şəkildə insanların davranışında, hərəkətində büruzə verəcək".
Elnur Rüstəmovun
fikrincə, psixoloji baxımdan pandemiyadan sonra insanlarda bu kimi
narahatlıqlar artacaq:
"Bir müddətdən sonra bəzi insanlar post-travmatik
stress deyilən bir xəstəliklə üz-üzə qalacaqlar. Bu nədir? Bir qism insanlar
yenə də təlaşda olacaq. Onlar pandemiyanın hər an qayıda biləcəyini düşünəcək.
Qabaqlayıcı tədbirlər görəcəklər. Pandemiyanın bitməsinə baxmayaraq, onlar evlərində
qoruyucu vasitələrlə gəzəcək. Bu, bir müddət onların davranışında özünü göstərəcək.
Xüsusi risk qrupuna daxil olan insanlar olacaq ki, onlara mütləq şəkildə
psixoloji dəstək göstərmək lazım gələcək. Bu, iki qanunla tənzimlənir.
Birincisi, psixoloji yardım haqqında qanun və ikincisi isə təhsil qanununda
göstərilən psixoloji xidmətin təşklindən irəli gələn məqamlar".
Bahar Rüstəmli
