"Əminəm ki, Laçın şəhərini qısa
müddətdə bərpa edib, orada həyatı canlandıra biləcəyik. Laçını elə bir
səviyyəyə çatdırmalıyıq ki, düşmən bir daha ona tərəf baxmağa cəsarət etməsin”.
Qaynarinfo xəbər verir ki, bunu nəqliyyat
eksperti Ərşad Hüseynov Laçın şəhərinin nəzarətə götürülməsindən bir gün sonra –
avqusutun 27-si rayon mərkəzi ilə bağlı təəssüratlarını bölüşərkən deyib. O
bildirib ki, ermənilər Laçında məskunlaşmağa, hətta şəhəri özlərinin qondarma
rayonunun mərkəzinə çevirməyə cəhd ediblər:
"Lakin aydın şəkildə görünür ki, bunu
məhdud imkanlarla və "çamadan” əhvali-ruhiyyəsi ilə ediblər. Çünki şəhərimizin
1992-ci ildə vandalcasına dağıdıb talan etdikləri, yandırdıqları tikililərinin,
evlərinin əksəriyyəti elə viran edilmiş vəziyyətdə qalıb. Bizim camaatımızın
salamat qalan evlərini (mənim təximinlərimlə bir neçə yüz salamat ev durur) bir
az təmir edib, oralarda məskunlaşıblar. Salamat qalan inzibati binalarımızdan
da inzibati məqsədlər üçün istifadə ediblər. Lakin tək-tük yeni tikili
tikiblər. Yeni tikililər də əsasən Xankəndi-Qərbi Zəngəzur yolunun şəhərdən
keçən hissəsinin kənarı boyuncadır və çoxu kommersiya xarakterli kiçik
tikililərdir. Bir-iki normal tikili də tikiblər. Məsələn, bizim rayon mərkəzi
xəstəxanasının xarabalıqları ilə üzbəüzdə, küçənin əks tərəfində yeni xəstəxana
tikiblər, amma bu kiçik bir xəstəxanadır, təxminən kənd xəstəxanası kimi. Şəhərdə
minimal kommunal təchizatı (qaz, işıq, su, telefon xətləri) da bərpa
edibmişlər. Mərkəzi küçələrin və qeyd etdiyim yolun kənarı boyu öz saxta
elementləri ilə "abadlaşdırma” işləri də etməyə çalışıblar (şəhərdən çıxarkən
onların hamısını söküb aparıblar). Amma şəhərin əksər məhəllələri, xüsusən də
mərkəzi küçələrdən kənar məhəllələri meşə və kolluğa çevrilib”.
Ərşad Hüseynov deyir ki, 2020-ci ilin
dekabrın 1-dən sonra şəhərin demək olar ki, boşaldılmış olduğu aşkar görünür:
"Bunu son il yarımda Laçın şəhərindən
dəfələrlə keçərkən də hiss etmişdim, çünki şəhər küçələrində hər dəfə ən çoxu
2-3 adam görmüşüdüm. Yuxarıda qeyd etdim ki, bir neçə yüz evdə yaşayırmışlar.
Lakin aydın şəkildə görünür ki, həmin evlərdə son bir ildə və ya il yarımda
yaşayış olmayıb, çünki həmin evlərin həyətini, qapı-bacasını alaq otları basıb,
evlərdə təxminən 1-1,5 il əvvəl atılıb qalmış ərzaq qalıqları, geyim əşyaları
var, küçələrin səkilərini ot, kol-kos basıb və s. Sağlıq olsun, laçınlılar
tezliklə öz evlərinə dönər və qeyd etdiklərimi daha detallı şəkildə özləri
görərlər”.
Bahar Rüstəmli
