Bu il sayca III dəfə Türkiyənin paytaxtı İstanbulda təşkil olunacaq klublararası Avropa Çimərlik Futbolu Çempionatı 2016 turnirində Azərbaycan da təmsil olunacaq.
Cümhuriyyət.az xəbər verir ki, 3-5 iyun aralığında keçiriləcək turnirdə Azərbaycanı yeni yaradılmış “Lalə-Təpə” klubu təmsil edəcək. İtaliyanın “Milan”, İspaniyanın “Valensiya”, Türkiyənin “Antalyaspor” klubları çempionluq yarışında “Lalə-Təpə”nin rəqibi olacaq.
Klubun təsisçisi Elvin Quliyev Cümhuriyyət.az-a açıqlamasında “Lalə-Təpə”nin Azərbaycan milli komandasının çimərlik futbolçularından təşkil olunacağını və Türkiyə yığmasından da futbolçu cəlb etmək istədiklərini bildirib: “Kluba ilk dəstəyi AFFA və Çimərlik Futbolu Federasiyası verdi. Məqsədimiz şəhidlərin qanı ilə tanıtdığımız Lalə Təpəni tanıtmaqdır” – deyə Quliyev əlavə edib.
Qeyd edək ki, çempionat 550 ton dəniz qumu tökülərək qurulan “Marmara Forum”da təşkil olunacaq. "NTV Spor", "BeİN Sports" kimi tanınmış idman telekanllarından yayımlanacaq.
