Xalq yazıçısı Elçin Əfəndiyevin senarisi əsasında Azərbaycan və Türkiyənin birgə istehsalı olan “Mahmud və Məryəm ” filmi nəhayət ki, tamaşaçıların ixtiyarına verilib.
Filmin Azərbaycan tərəfdən prodüseri, “Azərbaycanfilm” kinostudiyasının direktoru Müşfiq Hətəmovun Qaynar.info-ya verdiyi məlumata görə filimin təqdimat mərasimi martın 18-də İstanbulda baş tutacaq: “Artıq mən də daxil olmaqla filmin yaradıcı heyyəti və aktyorlar İstanbula yola düşüb. Əminəm ki, filmin təqdimat mərasimi uğurla keçiriləcək və film tamaşaçıların xoşuna gələcək”
Xatırladaq ki, “Mahmud və Məryəm” filminin bir çox epizodları Azərbaycanın tarixi məkanlarında çəkilib. Çəkilişlər əsasən Şəki rayonunun qoruq ərazisində, tarixi binalarda, Şəki Xan Sarayının həyətində, qala divarları ətrafında, Kiş Alban məbədi və əsasən Karvansarayda aparılıb.
Filmdə baş rollardan olan Mahmud rolunu “Öyle bir geçər zaman ki...” teleserialında Mete rolu ilə məhşurlaşan Aras Bulut, Məryəm rolunu isə qazaxıstanlı Eva Dedova oynayır. Filmdə türkiyəli aktyorlarla yanaşı, Azərbaycanın kino xadimləri iştirak edib. Azərbaycanın xalq artisti Fəxrəddin Manafov filmdə Ziyadxan rolunda çəkilib. Azərbaycan və Türkiyənin Mədəniyyət Nazirliklərinin dəstəyi ilə çəkilən filmin Ərəb və Avropa ölkələri də daxil olmaqla, 30-dan çox ölkədə satışı planlaşdırılır.
Qaynar.info 
