Zərdab rayonunda pensiyaların verilməsində bir sıra problemlər yaşanır.
Qaynar.info avropa.info-ya istinadən bildirir ki, artıq iki gündür pensiyaların hesaba köçürülməsinə baxmayaraq vətəndaşlar öz pullarını bankomatdan çıxarmaqda çətinlik çəkirlər.
Rayon sakinlərinin pensiyalarını almasında yaranan problem isə rayon ərazisində yerləşən 3 bankomatdan, sadəcə, birinin işləməsi ilə bağlıdır.
"Kapital bank"ın rayon ərazisində yerləşən bankomatları uzun zamandır işləmədiyi və yaranmış problemlə maraqlanan olmadığı üçün sakinlər pensiyalarını bəzən bezərək başqa banklara aid bankomatlardan çıxarmalı olurlar. Bu zaman da təbii ki, pensiyanın bir hissəsi həmin bankomat tərəfindən tutulur.
Qocalar, yaşlı qadınlar və xəstələr gecə saat 1-ə qədər işləyən yeganə bankomatın qarşısında növbə tutmalı olur.
Məsələni ağırlaşdıran bir başqa nüans də ondan ibarətdir ki, rayon ərazisində işləyən yeganə bankomat təkcə rayon əhalisinə deyil, həm də kəndlərdən gələn pensiyaçılara xidmət etməli olur.
Rayonun pensiyaçıları səbirsizliklə məsələ ilə bağlı aidiyyəti qurumların bir tədbir görməsini gözləyirlər.
Qaynar.info
