“Belə böyük bir tədbirin Bakıda keçirilməsinə razılıq verdiyi üçün Beynəlxalq Cüdo Federasiyasının (İJF) prezidenti Marius Vizerə təşəkkür edirəm. 100 ölkədən 400-ə yaxın nümayəndə gəlib və bu, bütün dünyanı əhatə edən bir seminardır”.
Qaynarinfo.Az xəbər verir ki, bunu Azərbaycan Cüdo Federasiyasının prezidenti Rövnəq Abdullayev deyib.
Bu gün Bakıda cüdo hakimləri və məşqçiləri üçün təşkil edilən seminarın startından öncə brifinq keçirən federasiya prezidenti bundan məmnunluq duyduğunu söyləyib: “Çalışacağıq ki, qonaqlara Azərbaycanın və onun cüdosunun inkişafda olduğunu göstərək. Çox şadıq ki, cüdonun inkişafı yolunda böyük dəyişikliklər məhz ölkəmizdə baş verəcək. Bu da bizim üçün şərəfdir. Azərbaycanda artıq 10 minlərlə uşaq cüdo ilə məşğul olmağa başlayıb. Bu idman növü ölkəmizdə populyarlaşıb. Bu populyarlığın nəticəsidir ki, dünya böyükləri bura toplaşırlar. Gələn il ölkəmizdə keçiriləcək dünya çempionatının cüdonun inkişafına böyük təkan verəcəyinə inanıram”.
Rövnəq Abdullayev cüdo üzrə milli komandamızın baş məşqçisi məsələsinə də münasibət bildirib. O, Avstriyada məhkəməsi davam edən baş məşqçi Peter Zayzenbaxerlə bağlı hələ qərar vermədiklərini söyləyib. Federasiya prezidenti məhkəmənin yekununu gözlədiklərini vurğulayıb: “Gəlin, bu məsələyə məhkəmə bitdikdən sonra qayıdaq. Hələlik nəsə deməyim doğru olmaz”.
Qeyd edək ki, avstriyalı Olimpiya çempionu Peter Zayzenbaxer azyaşlı uşağa təcavüzdə günahlandırılır.
Qaynarinfo.Az
