Xüsusi əməliyyat zamanı zərərsizləşdirilən “İmarat Kavkaz” terror təşkilatının lideri Doku Umarovun cəsədinin şəklini paylaşan Çeçen prezidenti bunu inanmayanlar üçün etdiyini bildirib. Anspress-in məlumatına görə, özünəməxsus şəkildə terroristi təhqir edən Kadırov “Bu siçovulun hələ də yaşadığına inanmaq istəyənlər üçün, ölümündən sonrakı şəklini də göstərə bilərik” - deyə status paylaşıb.
Qeyd edək ki, bu ilin aprel ayında RF Federal təhlükəsizlik xidməti (FTX) rəhbəri Aleksandr Bortnikov 2013-cü ilin sonunda xüsusi əməliyyat zamanı Umarovun öldürülməsi xəbərini verib. “Əməliyyatın nəticələri barədə danışmaq tezdir. Vaxtı çatanda ictimaiyyətə nəyi necə etdiyimiz barədə məlumat verəcəyik”- deyə Bortnikov şərh verib.
Bortnikovun şərhi ictimaiyyətdə birmənalı qarşılanmayıb və xəbərə inanmayanlar olub. Belə ki, FTX-nin rəsmi iddiasına görə məxsusi və siyasi səbəblərdən Umarovun öldürülməsi bir müddət əməliyyat sirri kimi saxlanılıb.
Bununla da Çeçenistan prezidentinin paylaşdığı şəkil bir çox şübhələrə son qoyur.
Qaynar.info
