Rusiyaya qarşı bütün iqtisadi sanksiyaların altı ay uzadılması ilə bağlı razılığa gəlindi

Qaynarinfo xəbər verir ki, bu barədə "Azadlıq” radiosunun müxbiri Rikard Jozviak məlumat verib. 

"Aİ səfirləri Aİ-nin Rusiyaya qarşı bütün iqtisadi sanksiyalarını daha altı ay davam etdirmək üçün rəsmən yaşıl işıq yandırıblar.

Söhbət 2014-cü ildə Rusiyanın Ukraynaya ilk təcavüzündən sonra tətbiq edilən və 2022-ci ilin fevralından genişmiqyaslı müharibənin başlaması ilə əhəmiyyətli dərəcədə genişlənən sanksiyalardan gedir.

Xatırladaq ki, 2022-ci ilin dekabrında Aİ Şurası Ukraynaya qarşı müharibəyə görə Rusiyaya qarşı doqquzuncu sanksiyalar paketini təsdiqləyib. 10-cu paketin hazırlanması davam edir, o, çox güman ki, tammiqyaslı müharibənin ildönümünə qədər təsdiqlənəcək.

Qeyri-rəsmi şərhlərdən məlum olur ki, onlar Rusiyanın təbliğat resurslarına qarşı əlavə məhdudiyyətləri və Rusiya banklarının SWIFT-dən yeni kəsilməsini, həmçinin Belarusa qarşı sanksiyaların Rusiyaya qarşı artıq tətbiq edilmiş sektoral sanksiyalarla sinxronlaşdırılmasını müzakirə edirlər. Polşa və Litva Aİ-ni Rusiyanın nüvə sektoruna qarşı sanksiyalar tətbiq etməyə çağırır.